María Gomez heldur úti lífsstílsblogginu paz.is sem ætlað er nautnaseggjum sem hafa gaman af því að hafa fallegt í kringum sig, borða góðan mat, líta vel út og njóta lífsins með fjölskyldunni.

María er fagurkeri með meiru og er hún dugleg að deila girnilegum uppskriftum með lesendum. María deilir með okkur ofureinföldum og hrikalega góðum pítsusnúðum sem slá alls staðar í gegn.

Pítsusnúðar að hætti Maríu Gomez:

Innihald:

4 bollar hveiti
2 tsk. salt
2 msk. hunang
1 bréf þurrger eða 1½ matskeið
1½ bolli volgt vatn
1 msk. óreganó eða pítsukrydd frá Prima
Smávegis af svörtum pipar (val)

Aðferð:

Setjið volgt vatn, hunang og ger saman í skál og hrærið vel. Leyfið því að standa í um 5 mínútur eða þar til þykk leirkennd froða hefur myndast ofan á. Setjið allt þurrefni saman í hrærivél og hellið gerblöndunni smám saman út í á meðan vélin er að hnoða. Bætið hálfum bolla af volgu vatni við smátt og smátt. Leyfið deiginu að hefast í að minnsta kosti 30 mínútur. Stráið hveiti á borðið og ofan á deigið og fletjið út með kökukefli. Ekki gera það of flatt heldur leyfið því að halda örlítilli þykkt.

Deigið að hefast Deigið þarf að hefast í 30 mínútur.

Fylling:

Pítsusósa (María mælir með Contadina)
Pepperóní
Rifinn ostur
Óreganó eða pítsukrydd

Aðferð:

Smyrjið pítsusósu yfir deigið og klippið pepperóní niður í ræmur. Dreifið svo rifna ostinum yfir og að lokum pepperóníinu. Stráið pítsukryddi eða óreganó yfir allt, rúllið deiginu upp og skerið snúðana í hæfilega stærð. Gott er að strá örlitlu af rifnum osti yfir snúðana ef vill. Bakist á 200°C á blæstri í 20 mínútur eða þar til snúðarnir eru orðnir gullinbrúnir að lit.