Þingmenn fá greiddan aksturskostnað, húsnæðiskostnað, síma, tölvu, blóm og flug. Í dag er greint frá því að þingmenn fái hótelgistingu og fæði og jafnvel vínglas þegar vel liggur á þeim frá skattgreiðendum. DV ákvað að taka saman fimm hluti sem þingmenn ættu að fá frítt.
Þingmenn ættu að fá vikulega pítsuveislu frá Gömlu smiðjunni í Lækjargötu og ársbirgðir af Ís cola til að skola pítsunum niður.
Allir þingmenn ættu að fá danska fótanuddtækið Clairol Foot Spa sem er til sölu í Radíóbúðinni í Reykjavík á aðeins 2.600 krónur.
Allir þingmenn ættu að fá gjafakort með inneign að allt að fimm hundruð þúsundum í Miklagarði, stærstu verslun landsins. Þar er Lögurinn á kostakjörum og fiskborðið er alltaf vinsælt. Við bendum þingmönnum á að gleyma ekki að kippa með sér Frískamín.
Fyrst þingmenn fá borgað fyrir að keyra þá hljóta þeir að fá borgað fyrir að ganga, það segir sig sjálft. Þingmenn sem ganga meira en 15 þúsund kílómetra á ári yrðu svo skyldaðir til að taka skó á leigu.
Þingmenn fá að vísu frítt flug innanlands og líka erlendis ef þeir eru að ferðast vegna þingstarfa. Það er samt sem áður nauðsynlegt að fá einnig frítt flug til að ferðast í frístundum. Það væri því við hæfi að þingmenn fengju gjafabréf aðra leið út í heim með Arnarflugi.
