„Konudagurinn er á sunnudaginn en við leggjum áherslu á að karlar komi hingað á laugardaginn og kaupi gjöf handa sinni heittelskuðu. Ég verð þá hérna sjálf í búðinni og ætla að aðstoða karlana við val á gjöfum. Síðan erum við að sjálfsögðu með gjafabréf og þau eru alltaf vinsæl,“ segir Sara Lind Pálsdóttir, öðru nafni Sara í Júník, en verslunin er staðsett á annarri hæð í Kringlunni og nýtur mikilla vinsælda.

Flestir hafa heyrt verslunina Júník nefnda á nafn og ég spyr Söru hvers vegna búðin sé svona þekkt og vinsæl?

„Það sem einkennir okkur er að við erum „unique“, við tökum inn lítið af hverri flík því fólk vill síður að margar flíkur séu eins. Þetta er líklega það sem fólki líkar best við Júník. Þegar þú kaupir þér eitthvað á Íslandi er voðalega leiðinlegt að sjá margar konur í alveg eins flík eða mæta konu á árshátíðinni í eins kjól og þú varst að kaupa þér. Við tökum yfirleitt bara inn 6 til 12 eintök af hverri flík, þegar um er að ræða kjóla og samfestinga. Það er öðruvísi þegar um er að ræða almennari klæðnað og eitthvað sem allir þurfa.“

Að sögn Söru er aldurshópur viðskiptavina Júník afar breiður, allt frá 12–14 ára unglingsstúlkum upp í jafnvel áttræðar konur. Stærsti aldurshópurinn er líklega 16–45 ára.

Vegan-pelsar í Júník njóta gífurlegra vinsælda. „Karlmenn hafa verið að kaupa þetta mikið í afmælisgjafir og aðrar tækifærisgjafir og þetta er kjörin gjöf á konudaginn. Þeir kosta 18.990 krónur og þar sem þetta eru vegan-pelsar þá er ekkert hárlos í þeim. Allar konur þurfa að eiga pels og þessi er kjörinn,“ segir Sara.

Hún segir að viðskiptavinir séu mjög spenntir yfir snappinu junikiceland þar sem sífellt eru kynntar nýjar og spennandi vörur. Nánari upplýsingar er líka á finna á vefsíðunni junik.is og á www.facebook.com/junik.like/