Hvað kemur upp í hugann þegar rætt er um besta hótel í heimi? Líklega er hár verðmiði eitt það fyrsta. En besta hótel í heimi, samkvæmt TripAdvisor, er lítið hótel í Kambódíu þar sem nóttin kostar um ellefu þúsund krónur.

Hótelið varð hlutskarpast í árlegu vali TripAdvisor, Travellers’ Choice Awards, en niðurstaðan er byggð á reikniriti sem tekur saman umsagnir og einkunnir gesta hótela um allan heim. Hótelið í Kambódíu, sem heitir Viroth’s Hotel, er í norðvesturhluta landsins, í Siem Reap, og skartar 35 herbergjum, 20 metra sundlaug, heilsurækt, nuddstofu og veitingastað.

Hótelið var með 910 umsagnir á síðasta ári og gáfu 95 prósent notenda hótelinu einkunnina „excellent“. Enginn gaf hótelinu einkunn undir meðallagi. Hótelið er lítið og glæsilegt og er þema þess sjötti áratugur liðinnar aldar. Hótelið býðst til að sækja og skutla gestum í gamalli Mercedes Benz-limmósínu milli staða. Gestir hrósa hótelinu fyrir að vera kyrrlátt, gestrisið og með afburðakurteist starfsfólk. Þá sé leitun að hóteli þar sem meiri áhersla er lögð á hreinlæti.

TripAdvisor verðlaunar hótel á hverju ári í mörgum flokkum; meðal annars fyrir bestu þjónustuna og hvar fólk fær mest fyrir peninginn. Fyrrnefnt hótel í Kambódíu fékk hæstu einkunn í samanlögðu, ef svo má segja. Besta lúxushótelið heitir Baros Maldives og er á Maldíveyjum. Athygli vekur að eitt íslenskt hótel komst á listann, en það var í flokknum Bed and Breakfast. Guesthouse 1×16 í Keflavík var í 18. sæti á þeim lista.