„Fólk gerir sér oft ekki grein fyrir því hvað gardínuþvottur getur sparað mikla peninga. Fyrirtæki eru stundum að henda sérsaumuðum gardínum sem kosta 40.000 krónur stykkið á meðan það kostar aðeins 3.000 krónur að þvo þær svo þær verði alveg eins og nýjar. Þetta er bæði sóun á peningum og plasti,“ segir Íris Eiríksdóttir hjá fyrirtækinu Nýja tæknihreinsunin sem sérhæfir sig í gardínuþvotti.

Nýja tæknihreinsunin sinnir bæði gardínuþvotti fyrir einstaklinga, fyrirtæki og stofnanir. Almenningur kemur gjarnan með gardínur í þvott fyrir jólin en verkefni fyrir fyrirtæki og stofnanir eru stærri og reglulegri. Íris segir að gott sé að þvo gardínur á að minnsta kosti tveggja ár fresti: „Sólin eyðileggur þetta svo mikið ef ekki er þvegið,“ segir hún.

Nýja tæknihreinsunin er með föst verkefni í gardínuþvotti fyrir Alþingi, Landspítalann, Össur og fleiri stóra aðila. Notast er við eina stóra vél fyrir verkin, sem er innflutt frá Bandaríkjunum, en vélin er sérhönnuð fyrir gardínuþvott og gerð úr sérsmíðuðu stáli. Í vélina er síðan sett sérstök náttúruvæn sápa sem hentar fyrir gardínur.

„Fyrirtækið hefur starfað í 20 ár en ég og maðurinn minn tókum við rekstrinum af tengdaforeldrum mínum síðastliðinn maí. Við fluttum reksturinn frá Selfossi og í Kópavoginn og síðan um verslunarmannahelgina má segja að þetta hafi sprungið út og verkefnum hefur fjölgað gífurlega,“ segir Íris.

„Við höfum líka sérhæft okkur í sótthreinsun á gardínum fyrir myglu. Þannig tókum við fyrir allt Bugl-húsið hjá Landspítalanum í samvinnu við verkfræðistofuna Eflu. Sambærileg verkefni standa nú yfir fyrir aðra aðila.“

Nýja tæknihreinsunin er til húsa að Askalind 4 í Kópavogi. Símanúmer 897-3634.