Verslunin Bjarkarblóm er staðsett við nýja innganginn í Smáralind og er í eigu Bergþóru Bjargar Karlsdóttur en hún rekur auk þess verslun með sama nafni í Þorlákshöfn. Hjá Bjarkarblómum er lögð mikil áhersla á framúrskarandi úrval af ferskum blómum auk fjölbreyttrar gjafavöru þar sem íslensk hönnun skipar stóran sess.

„Rómantíkin ræður ríkjum hjá okkur á Valentínusardaginn og hér er alltaf mikið að gera á þessum degi. Hann hefur vissulega fest sig í sessi meðal Íslendinga en þar sem þetta er líka alþjóðlegur dagur koma mjög margir útlendingar sem eru búsettir hér á landi í verslunina og kaupa blóm,“ segir Bergþóra.

Valentínusardagurinn hefur sótt mjög í sig veðrið hér á Íslandi og segir Bergþóra að útvarpskonan Valdís Gunnarsdóttir heitin eigi heiðurinn af því að hafa innleitt venjur Valentínusardagsins hér á landi. Valdís var afar ástsæl útvarpskona á Bylgjunni en hún lést fyrir aldur fram. „Valdís er okkur mjög hugstæð og við hugsum alltaf hlýlega til hennar á þessum degi,“ segir Bergþóra.

„Við höfum alltaf fjölbreyttara úrval af blómvöndum á Valentínusardaginn og þar sem þetta er alþjóðlegur dagur erum við með nokkuð af óhefðbundnum blómum ásamt þessum hefðbundnu, rósum, sem eru alltaf klassískar, og þvíumlíku.“
Þó að vitanlega komi margir ungir menn í verslunina á Valentínusardaginn til að kaupa blóm handa sinni heittelskuðu þá segir Bergþóra að eldri herramenn séu mjög að sækja í sig veðrið á þessu sviði og mjög margir eldri borgarar eiga viðskipti við Bjarkarblóm á Valentínusardaginn.

Verslunin í Smáralind er opin frá kl. 10 til 18 á Valentínusardaginn og Bjarkarblóm í Þorlákshöfn er opin frá kl. 13 til 18. Það er um að gera að fullkomna þennan dag elskenda með því að koma við í Bjarkarblómum og velja litríkan og fallegan blómvönd handa ástinni sinni. Segðu það með blómum!

Sjá nánar á bjarkarblom.is.