Kári Már Óskarsson stofnaði fyrir ári fyrirtækið Kyon Apparel, sem hannar og selur hágæða íþróttafatnað á hagstæðu verði. Fatnaðurinn fæst hér heima, en hefur einnig verið vel tekið erlendis, en hann er meðal annars seldur í Bandaríkjunum, Bretlandi og Rússlandi.

„Ég ákvað að láta eigin draum rætast og gera mitt eigið í stað þess að vinna að draumi annars,“ segir Kári, sem er 22 ára gamall. „Ég hef alltaf haft áhuga á fötum og er mjög smámunasamur þegar kemur að fatnaði. Þess vegna finnst mér gott að hanna mín eigin föt.“

Kári hannar fötin sjálfur, en þau eru saumuð víðs vegar um heiminn. Kyon Apparel byrjaði í íþróttafatnaði eingöngu, en framleiðsla á öðrum hágæðafatnaði er í vinnslu.

„Það var einfaldara að byrja í íþróttafatnaðinum,“ segir Kári. „Hönnunin er ekki eins flókin og tekur styttri tíma. Ég legg engu að síður mikla áherslu á gæði og vil ekki selja fólki fatnað sem er lélegur í gæðum.“

Það er áhuginn sem drífur Kára áfram. Hann er lærður einkaþjálfari og hefur margra ára reynslu af líkamsrækt og þekkir því vel hvaða gæði og eiginleika íþróttafatnaður þarf að hafa til að endast vel og vera þægilegur í ræktinni.

Nýjar vörur í vinnslu

„Íþróttafatnaður mun alltaf vera til staðar hjá mér og nýjar vörur koma inn þar, en núna er ég að vinna að öðrum fatnaði, sem liggur meiri vinna á bak við, það tekur um þrjá mánuði að hanna hverja flík, sauma og svo framvegis,“ segir Kári, sem hyggst færa sig meira yfir í hönnun á hversdags- og sparifatnaði.