„Við verðum með fullt af opnunartilboðum, þrautabraut fyrir hundana, vörukynningar fyrir hunda sem geta fengið að smakka og svo ætlar grillvagninn frá Veisluspjóti að grilla pylsur ofan í tvífætlingana. Ennfremur verða happadrætti og alls konar húllum hæ.“

Þetta segir Ingibjörg Salome hjá Gæludýr.is en fyrirtækið opnar nýja og glæsilega gæludýraverslun á Fiskislóð 1, í Ellingsen-húsinu úti á Granda. Opnunarhátíð verður í nýju versluninni á laugardag og stendur frá kl. 12 til 16.

Ingibjörg segir að mikil þörf hafi verið á gæludýraverslun á þessu svæði og þar búi margir núverandi viðskiptavinir fyrirtækisins sem taki því fagnandi að fá verslun fyrir gæludýrin sín í hverfið:

„Við höfum horft lengi til þess að fara vestur í bæ en það hefur bara ekki verið hentugt húsnæði í boði fyrr en þetta frábæra tækifæri kom sem við vorum ekki lengi að grípa. Við erum fyrir með vefverslun og verslanir í Korputorgi, Smáratorgi og í Hafnarfirði. Það hefur hins vegar verið vandamál á svæðinu frá Kringlunni og alveg vestur eftir að þar hefur vantað gæludýraverslun á svæðið. Til dæmis eru fjöldamargir hundar skráðir á Seltjarnarnesi og í Vesturbænum. Við höfum líka verið að keyra mjög margar pantanir úr vefversluninni á þetta svæði og því munum við klárlega hitta marga af viðskiptavinum okkar í þessari nýju verslun og ég efast ekki um að þeir munu taka henni fagnandi, enda hafa margir íbúar svæðisins lagt á sig akstur í verslanirnar á Korputorgi og Smáratorgi.“

Þá bendir Ingibjörg á að aðkoma að nýju versluninni sé mjög góð og næg bílastæði, sem er nauðsynlegt fyrir verslun af þessu tagi:

„Okkar viðskiptavinir eru að kaupa í miklu magni, t.d. 15 kílóa sekki af hundafóðri eða 10-15 kílóa sekki af kattasandi. Það er mikilvægt fyrir verslun af þessu tagi að hægt sé að leggja beint fyrir utan og bera vöruna út í bíl án þess að þurfa að ganga einhverja vegalengd með hana.“

Lágvöruverðsverslun með frábærri þjónustu

Gæludýr.is er í eðli sínu lágvöruverslun þar sem lágt verð fæst með lítilli yfirbyggingu, miklum magninnkaupum og fáu starfsfólki og þar með lágu þjónustustigi. „Hins vegar hafa hlutirnir óvart þróast þannig að við erum að veita mjög góða þjónustu, einfaldlega vegna þess hvað við erum heppin með starfsfólk sem leggur sig mjög fram,“ segir Ingibjörg.

Sem fyrr segir er vefverslun á gæludýr.is og þar eru auk þess nánari upplýsingar um fyrirtækið.

Mál málanna núna er hins vegar ný og glæsileg gæludýraverslun í Ellingsenhúsinu, Fiskislóð 1. Sem fyrr segir stendur opnunarhátíðin frá klukkan 12 til 16 á laugardeginum.