Óttar Guðmundsson geðlæknir var á fundi fyrir skemmstu með skandinavískum geðlæknum. Viðfangsefnið var að ræða fyrirbæri sem kallast örmögnunarþunglyndi sem Óttar segir að fari hratt vaxandi.

Óttar segir frá þessu í pistli í Fréttablaðinu, en pistillinn ber yfirskriftina Ný ógn. En hvað er örmögnunarþunglyndi? Óttar segir:

„Lýsingin gæti verið þessi: Manneskja á aldrinum 30-60 ára í krefjandi starfi. Vinnan verður með tímanum æ flóknari og kröfurnar um alls kyns tæknikunnáttu æ meiri. Fólk verður að tileinka sér tækninýjungar sem smám saman verða yfirþyrmandi. Kröfurnar í einkalífinu aukast að sama skapi. Skutla þarf heimilisfólki í alls konar tómstundastarf og sjá um heimilisstörf, eldamennsku, þvott og bílinn. Og ekki þarf að fjölyrða um það að samlíf hjóna versnar eftir því sem álagið eykst. Heimilið breytist smám saman í fyrirtæki sem verður að halda gangandi og sjá til þess að allir standist kröfur skólans, vinnunnar og einkalífsins. Þessu fylgja ótrúlegar nýjungar í samskiptatækni svo að allir séu alltaf ínáanlegir. Símarnir gelta stanslaust með nýjar kröfur, nýjar myndir og skilaboð. Hraðinn eykst.“

Óttar heldur áfram og segir að loks komi að því að viðkomandi gefst upp enda sé mannsheilinn ekki gerður fyrir slíkt álag.

„Skyndilega var eins og viðkomandi keyrði á fullri ferð á vegg. Hann gafst upp, missti kjark og trú á sjálfan sig og lagðist í rúmið. Mannsheilinn var hreinlega ekki hannaður fyrir þetta álag. Hann gat ekki sinnt öllum verkefnum samtímis. Tæknin hafði tekið öll völd og gert lífið óviðráðanlegt.“

Óttar segir að þetta minni að nokkru leyti á Glám í Grettis sögu þar sem vinnumaðurinn tók smám saman öll völd á heimili húsbænda sinna og reið húsum fúll á svip.

„Það varð Gretti dýrkeypt að sigra drauginn enda týndi hann sjálfum sér. Menn eru jafn ráðalausir gagnvart þessum Glámi nútímans. Maðurinn á enga aðra kosti en gangast draugnum á vald með ófyrirsjáanlegum afleiðingum eða hætta að láta tæknina stjórna lífi sínu.“