Gistihúsið – Lake Hotel Egilsstaðir. Yfir hundrað ára gamalt hótel við Lagarfljót
Í Gistihúsið – Lake Hotel Egilsstaðir er starfræktur háklassa veitingastaður þar sem matreiðslumeistarinn Kolbrún Hólm, ásamt fyrsta flokks matreiðslumönnum, ber á borð dýrindis lystisemdir sem gleðja bæði hjarta og bragðlauka matargesta. Staðurinn nefnist Eldhúsið – Restaurant og er alla jafna mikið að gera á kvöldin en einnig í hádeginu. Undanfarin ár hafa Íslendingar í auknum mæli uppgötvað hversu notalegt það er að leyfa sér smávegis í hádeginu en þá er oft hægt að fá matinn á töluvert betra verði en á kvöldin. „Eldhúsið – Restaurant leggur upp með að framreiða mat úr staðbundnu og fersku hráefni sem reynt er eftir fremsta megni að nálgast úr héraði. Allt okkar nautakjöt kemur af Egilsstaðabúinu og skyrið og fetaosturinn einnig,“ segir Hulda Elisabeth Daníelsdóttir, eigandi Gistihúsið – Lake Hotel.
Í hádeginu býður Eldhúsið – Restaurant upp á nokkuð léttari rétti en á kvöldin, og eins og gengur og gerist með hádegisrétti, þá eru þeir á afar hagstæðu verði. Matseðla má nálgast á vefsíðu Gistihússins; lakehotel.is. Matreiðslumennirnir eru þeir sömu og matreiða mat á kvöldin og því er ætíð hægt að ganga að því vísu að maturinn sé fyrsta flokks. Hádegisverður er framreiddur alla daga frá kl. 11.30–17.00.
Sumarið 1998 opnuðu hjónin Hulda og Gunnlaugur Jónasson Gistihúsið sem hafði staðið autt um árabil. Í dag reka hjónin hótel í húsinu og nefnist það Gistihúsið – Lake Hotel Egilsstaðir, sem hefur verið hótel síðan árið 2000. „Hótelið byggir á aldargömlum grunni og við vildum nota gamla nafnið, Gistihúsið, til þess að vísa í sögu hússins. En hér hefur löngum verið starfrækt gistihús.
Húsið var reist fyrir meira en öld og síðan þá hefur reglulega verið byggt við. Í október árið 2013 tóku hjónin Hulda og Gunnlaugur skóflustungu að nýrri 1.500 fermetra byggingu sunnan við gamla húsið og tóku á móti gestum í nýrri gestamóttöku og gistiálmu sumarið 2014. Í nýjasta hluta hótelsins er að finna fjögurra hæða hús með 32 herbergjum. Fjögur þeirra eru lúxusherbergi og sex eru hönnuð sérstaklega með þarfir fatlaðra í huga. Í dag telur hótelið 50 herbergi alls. Á neðri hæð móttökuhússins er heilsulindin Baðhúsið – Spa, með heitri smálaug, köldum potti, sánu og hvíldaraðstöðu með útsýn yfir Lagarfljót. Að auki eru í nýbyggingunni þvottahús, starfsmannaaðstaða, snyrtingar, geymslu- og skrifstofurými.
Sumarið 1999 opnuðu hjónakornin veitingaþjónustu á Gistihúsinu eingöngu fyrir hópa og stuttu síðar fyrir almenning einnig. Árið 2014, þegar nýbyggingin var klár, nefndu þau veitingastaðinn Eldhúsið – Restaurant. „Veitingastaðurinn hefur verið rekinn hér í um 17 ár og við höfum boðið upp á hádegisverð síðustu sex ár. Það er yfirleitt mikið að gera hjá okkur á kvöldin og þá sérstaklega á ferðamannatímanum. Hér á hótelinu erum við með notalega heilsulind, Baðhúsið – Spa. Um helgar er til dæmis mjög vinsælt fyrir bæði heimamenn og ferðamenn að gera sér glaðan dag í hádegismat á Eldhúsinu – Restaurant og leyfa þreytu liðinnar viku að líða úr kroppnum í Baðhúsið – Spa. Á veturna leigjum við líka út gönguskíði og eru gönguskíðabrautir lagðar kringum hótelið þegar nægur snjór er. Þá er sérlega notalegt að enda góða morgunskíðagöngu í hádegismat eða kaffi hjá okkur,“ segir Hulda.
Eldhúsið – Restaurant er til húsa í Gistihúsið – Lake Hotel Egilsstaðir, við Þjóðveg 1, Egilsstaðir 1–2, 700 Egilsstöðum
Veitingastaðurinn er opinn alla daga allan ársins hring.
Sími: 471-1114
Email:hotel@gistihusid.is
Nánari upplýsingar má nálgast á vefsíðu Gistihússins.
