Alskil býður upp á alhliða þjónustu þegar kemur að heildarlausnum í greiðslumiðlun og innheimtu fyrir fyrirtæki af öllum stærðum og gerðum. „Fyrirtæki geta nýtt sér margskonar þjónustu og við sérsníðum lausnir okkar eftir þörfum hvers og eins, allt frá því að stofna kröfur á kaupendur, prenta og senda út reikninga og móttaka greiðslu til þess að skila gögnum inn í bókhaldskerfi viðskiptavina. Í framhaldinu er boðið upp á hefðbundna milliinnheimtu og löginnheimtu ef þörf er á,” segir Ívar Ragnarsson, framkvæmdastjóri Alskila.
Þjónusta Alskila er í grundvallaratriðum þrískipt, þ.e. greiðslumiðlun, milliinnheimta og löginnheimta. Greiðslumiðlun er fyrsta stig innheimtu og hentar flestum fyrirtækjum með bókhaldskerfi. „Við tengjumst bókhaldskerfinu og lesum frá því gögn eða viðkomandi sendir okkur gögn,“ segir Ívar og útskýrir að greiðslumiðlun sé bæði í þágu kröfueiganda og greiðanda:
„Öll okkar starfsemi snýr bæði að eigendum krafna og greiðendum. Við vinnum fyrir kröfueigandann en hugsum jafnframt um hans viðskiptahagsmuni og viðskiptasambönd með því að halda innheimtukostnaði fyrir greiðendur í lágmarki. Greiðslumiðlunin sparar viðskiptavinum okkar tíma, fé og fyrirhöfn. Það að stofna bankakröfu og senda reikning felur í sér kostnað sem lendir ýmist á kröfueiganda eða á greiðanda í formi seðilgjalds. Með magnútsendingum nær Alskil að spara verulega þann kostnað sem af hlýst við þetta ferli, sem nýtist til lækkunar fyrir hvern þann sem ber kostnaðinn hverju sinni. Við náum seðilgjöldunum niður í krafti magns reikninga sem við sendum út fyrir umbjóðendur okkar. Mörg lítil í einum stórum pakka þýðir að við fáum betri kjör.“
Greiðslumiðlunin sjálf virkjast um leið og krafa er stofnuð:
„Þegar notendur greiðslumiðlunar okkar stofna kröfu í bókhaldskerfi sínu er gengið þannig frá málum að þær sendist til Alskila til prentunar og pökkunar í stað þess að viðskiptavinir okkar séu að eyða tíma í það. Við sjáum um að senda þetta út á því formi sem kaupandi þjónustunnar vill taka á móti og kröfueigandinn vill senda út. Þannig að ef þú ert kannski með hundrað eða þúsund greiðendur þá er ekki óalgengt að 20% þeirra fái rafrænan reikning, 30% fá einungis kröfu stofnaða í netbanka og fyrir restina er stofnuð bankakrafa og reikningur sendur út í pósti. Með þessu erum við í raun gátt fyrir kröfueigendurna og sendum kröfur á kaupendur þeirra með þeim hætti sem þeim hentar best. Þannig erum við að spara kröfueiganda mikla fyrirhöfn og tíma og starfsmenn fyrirtækisins geta einbeitt sér að sérsviði sínu í stað þess að eyða orku og tíma í innheimtustarfssemi. Kröfueigandi getur þannig sinnt sinni kjarnastarfssemi á meðan við sinnum okkar.“
Alskil, Suðurlandsbraut 30, Reykjavík
Sími: 515 7900
Heimasíða
