Pílukastfélag Reykjavíkur var stofnað þann 16. maí árið 1994 og hefur síðan þá glætt áhuga Íslendinga á því skemmtilega sporti sem pílukastið er. Í félaginu eru um 100 manns og haldið er úti liðakeppni með 18 liðum í A- og B-deild. Tímamót urðu í starfseminni nýlega þegar félagið flutti í nýtt og glæsilegt húsnæði að Tangarhöfða 2 í Reykjavík. Um er að ræða 300 fermetra húsnæði og í salnum eru 16 keppnisspjöld.
Í mars mun Pílukastfélagið bjóða upp á opið hús; opið hús verður á þriðjudagskvöldum út mánuðinn og síðan áfram þaðan í frá: „Okkur grunar að víða séu vinahópar að kasta pílum í bílskúrum eða tómastundaafdrepum í fyrirtækjum og langi til að kynnast sportinu betur. Við ætlum að bjóða þessu fólki að kynnast félaginu og þeirri aðstöðu sem við höfum yfir að ráða,“ segir Björgvin Sigurðsson, formaður Pílukastfélags Reykjavíkur.
Sendið tölvupóst á netfangið pilapfr@gmail.com til að fá nánari upplýsingar.
Heimasíða félagsins er www.pila.is.
