Örlítill munur virðist vera á milli kynjanna þegar kemur að fjölda bólfélaga á lífsleiðinni, samkvæmt könnun sem náði til tvö þúsund einstaklinga í Evrópu og Bandaríkjunum.

Í könnuninni, sem breska blaðið Independent vitnar til eiga karlar að meðaltali sex bólfélaga á lífsleiðinni en konur sjö.

Nokkur munur virðist einnig vera á milli landa. Þannig sögðust Ítalir að meðaltali hafa átt 5,4 bólfélaga en Íbúar Bretlands sjö. Önnur ríki sem könnunin náði til; Frakkland, Þýskaland og Spánn þar á meðal voru þar á milli.

Fleiri atriði voru skoðuð í könnuninni, til dæmis hver ákjósanlegur fjöldi bólfélaga er. Konur virðast fyrirgefa frekar í þeim efnum en karlar. Þannig sögðu karlar að það væri of mikið, að þeirra mati, ef kona hefði átt fjórtán eða fleiri bólfélaga. Konur aftur á móti sögðu að það væri of mikið ef karlar hefðu átt fimmtán bólfélaga eða fleiri.

Þá voru karlar nokkuð líklegri en konur til að ýkja fjölda bólfélaga. 17,5 prósent þeirra höfðu ýkt fjöldann á þá leið að bólfélagarnir væru fleiri en þeir voru í raun og veru. Hjá konum var þetta hlutfall 8,2 prósent. Þá sögðust 18,6 prósent kvenna hafa ýkt fjölda bólfélaga á þá leið að bólfélagarnir væru færri en þeir voru í raun. Hjá körlum var þetta hlutfall 13,2 prósent.