Þegar kemur að því að fjárfesta í nýjum bíl er úr vöndu að ráða og úrvalið gríðarlegt. Fjöldi bíla, bæklinga og mynda að skoða og spekúlera í. En nú er komin skemmtileg nýjung, því Ísband býður þér að skoða og kynna þér nýjan bíl í snjallsímanum.

Íslensk-Bandaríska ehf. í Mosfellsbæ er með bráðskemmtilega nýjung í boði fyrir væntanlega bílaeigendur, sem geta nú skoðað Jeep Compass í snjallsímanum. Þessi tækni hefur aldrei áður verið notuð hér á landi við kynningar á nýjum bíl.

Birta fór og kynnti sér málið og flautaði meðal annars bílflautunni, með snjallsímanum!

Flautan virkar! Það má meira að segja prófa flautuna í bílnum, með snjallsímanum.

Mynd: Brynja

„Um er að ræða sérhannað forrit fyrir kynningu á Jeep Compass, byggt á Tango hugbúnaði, sem Google hannaði fyrir snjallsíma. Og kynninguna sýnum við á Lenovo Phab2 Pro snjallsíma,“ segir Sigurður Kr. Björnsson, markaðstjóri Íslensk-Bandaríska ehf.

Engu líkara en bíllinn sé á staðnum Útlínur Compass eru teiknaðar á gólfi í sérstökum sýningarbás í sýningarsalnum og hægt er að skoða bílinn frá öllum sjónarhornum, hátt og lágt. Hægt er að skipta um lit og felgur á bílnum, skoða stjórntæki og síðast en ekki síst er hægt að fara inn í bíllinn. Einnig er hægt að opna farangursrýmið og virða það fyrir sér. Það er engu líkara en bíllinn sé hreinlega á staðnum þegar hann er skoðaður með þessari skemmtilegu tækni.

Mynd: Brynja

Jeep Compass verður síðan frumsýndur þann 26. ágúst næstkomandi, sama dag og bæjarhátíð Mosfellinga „Í túninu heima“ hefst.

Fyrstu bílarnir koma í lok ágúst, en þangað til má skoða þá í snjallsímanum. „Fyrstu bílar sem koma verða „Launch Edition“ og eru það vel útbúnir bílar í Limited útfærslu með mismunandi útbúnaði þó. Fyrst um sinn verður 2.0 lítra 170 hestafla dísilvél í boði, en síðar verður hægt að fá 1.4 lítra 170 hestafla bensínvél. Þá mun Compass verða fáanlegur í Trailhawk útfærslu, sem mun hafa meiri veghæð og vera betur útbúinn til aksturs utanvega,“ segir Sigurður.

Mynd: Brynja