Ef þú vonast til að finna ástina í örmum Hollywood-stjörnu, eða einhvers forríks einstaklings, á Tinder gætirðu orðið fyrir vonbrigðum.

Í þessu vinsæla stefnumótaappi er nefnilega sérstakt rými fyrir þá ríku, frægu og fallegu, ef svo má að orði komast. TechCrunch greindi frá þessu á dögunum og sagði frá því að aðeins útvaldir fái aðgang að svæðinu sem kallað er Tinder Select.

Allir meðlimir Tinder Select eiga það sameiginlegt að hafa skráð sig inn á Tinder-appið, eins og allir notendur gera, en þeim sem gengur sérstaklega vel, eða njóta sérstaktra vinsælda, fá boð um að komast í þennan lokaða félagsskap. Þegar þangað er komið hafa þessir notendur tækifæri til að tilnefna aðra notendur, til dæmis vini eða vinkonur, sem þannig fá möguleika á að komast í félagsskapinn að ýmsum skilyrðum uppfylltum.

Ekki liggur fyrir hvernig Tinder velur þá sem fá aðgang að þessu svæði, en vangaveltur hafa verið uppi að það, hvernig staðið er að valinu, tengist svoköllum Elo-stigum sem notendur safna. Áður hefur Sead Rad, stjórnarformaður Tinder, sagt að Elo-stigin væru reiknuð út með flóknum reikningsaðferðum.

Notendur á Reddit hafa tjáð sig um þetta og sagði til að mynda einn notandi að hann hefði fengið tilboð um að slást í hópinn fyrir fimm mánuðum. Það þykir gefa til kynna að þetta sérstaka rými hafi verið til staðar í þó nokkurn tíma, án þess að forsvarsmenn Tinder hafi tjáð sig um það eða opinberað að það væri yfir höfuð til.