Bátasmiðjan Rán á Djúpavogi verður með bás á Sjávarútvegssýningunni sem haldin er í Laugardalshöll dagana 28.–30. september. Um er að ræða vettvang fyrir fagaðila og aðra áhugasama til þess að sýna og kynna sér framfarir og nýjungar innan sjávarútvegsgeirans.

Vilhjálmur Benediktsson, stofnandi Ránar, er reyndur plastsuðumaður með suðuréttindi frá norska fyrirtækinu Teknoligisk Institut. Hann hefur um árabil soðið saman þjónustubáta úr HDPE-plasti (high density polyethylene), sem hefur mikla seiglu og gríðarlegt slagþol. Efnið er til dæmis fimm sinnum höggþolnara en trefjaplast. Þörungar og hrúðurkarlar festa sig illa við plastið og þarf því ekki að hafa áhyggjur af tæringu, málningu eða annarri meðhöndlun á yfirborði efnisins. HDPE er endurvinnanlegt að hluta til og líftími þess er yfir 50 ár. HDPE er eðlisléttara en vatn og flýtur því í sjó, og þar sem bátarnir eru smíðaður úr flotrörum sem skipt er niður í loftþétt hólf, eru þeir nánast ósökkvandi.

Mynd: Óskar Ragnarsson

Frumsmíði Ránar var smíðuð árið 2012 og var fyrirtækið stofnað sama ár. Ári síðar var fyrsti báturinn síðan seldur og afhentur Fiskeldi Austfjarða sem þjónustubátur við fiskeldi í Berufirði. Báturinn ber nafnið Fenrir 650 og er 6,5 metra langur rörabátur úr HDPE-plasti. Áþekkir bátar eru notaðir víða í Evrópu með mjög góðum árangri. „Við erum með stóran bát í smíðum núna, hann einir níu metrar, og er þetta þjónustubátur fyrir fiskeldi, eða bara hvað sem er. Hann er með sex manna stýrishúsi, dísilvél og öllum tilheyrandi siglingatækjum.“ segir Vilhjálmur. Rán framleiðir alhliða báta eins og þjónustubáta fyrir eldisstöðvar, björgunarbáta og fleira. „Við höfum líka hannað og smíðað flotbryggjur sem við erum með til sölu. Það er í raun hægt að nota HDPE-plastið í hvað sem er og möguleikarnir eru endalausir.“

Bátasmiðjan Rán er staðsett á Djúpavogi, Austurlandi.
Nánari upplýsingar má nálgast á vefsíðu fyrirtækisins www.boats.is og svara þeir félagar í síma 478-1020 og í vefpósti info@boats.is.