Alskil er greiðslumiðlunar- og innheimtufyrirtæki sem hefur ekki látið fara mikið fyrir sér á markaðnum líkt og helstu keppinautar þess. Engu að síður býður fyrirtækið upp á alhliða þjónustu þegar kemur að heildarlausnum í innheimtu fyrirtækja af öllum stærðum og gerðum. “Fyrirtæki geta nýtt sér margskonar þjónustu og við sérsníðum lausnir okkar eftir þörfum hvers og eins, allt frá því að gefa út reikninga, stofna kröfur á kaupendur, móttaka greiðslu og skila gögnum inn í bókhaldskerfi viðskiptavina. Í framhaldinu er boðið upp á hefðbundna milliinnheimtu og löginnheimtu ef þörf er á,” segir Ívar Ragnarsson, framkvæmdastjóri Alskila.

“Við veitum fyrirtækjum þjónustu sem við erum sérfræðingar í til þess að viðskiptavinir okkar geti sinnt hefðbundinni starfssemi sem er vissulega ekki á sviði innheimtu eða greiðslumiðlun,” segir Ívar ennfremur. “Við sinnum þessum verkþáttum með hagkvæmari hætti þar sem þetta er okkar sérhæfing, rétt eins og að faglærðir iðnaðarmenn sinna sínu starfi á hagkvæmari hátt en þeir sem ekki eru sérhæfðir á því sviði.” Þannig geta fyrirtæki náð fram umtalsverðri hagræðingu í rekstri sínum, sparað tíma og kostnað við útgáfu reikninga, svo sem pappírsnotkun, umslagapökkun, póstburðargjöld og svo framvegis.

Vinnusparnaðurinn sem Alskil getur skapað fyrirtækjum getur verið allt frá nokkrum klukkustundum á mánuði upp í heilu stöðugildin, allt eftir umfangi starfssemi þeirra. “Okkar kjarnastarfssemi er fólgin í greiðslumiðlun og sérsniðnum innheimtulausnum. Viðskiptavinir okkar eru allir í annars konar starfssemi og með því að nota þjónustu okkar þá geta fyrirtæki einbeitt sér að sinni kjarnastarfssemi. Alskil gæti því í raun verið síðasta púslið í vel heppanaðan rekstur viðskiptavina okkar.”

Gagnvart greiðendum leggur Alskil mikla áherslu á persónuleg, upplýsandi og jákvæð samskipti. Hjá fyrirtækinu starfar öflugur hópur fólks með sérhæfða þekkingu og reynslu á innheimtumálum. “Við viljum mikið frekar að fólk hafi samband við okkur ef það á í einhverjum greiðsluerfiðleikum með ógreiddar kröfur. Í lang flestum tilfellum má á tiltölulega auðveldan hátt finna leið til að greiða kröfuna með greiðslusamningum og á meðan staðið er í skilum með slíka samninga þá er ekki að leggjast óþarfa kostnaður á kröfuna,” segir Ívar.