Breski tónlistarmaðurinn Tom Odell heldur tónleika í Eldborgarsal Hörpu þann 24. ágúst næstkomandi. Frægðarsól Odell hefur risið hratt að undaförnu og hefur nýjasta plata hans „Wrong Crowd“ fengið einróma lof gagnrýnenda og notið mikillar hylli hjá ört vaxandi aðdáendahópi hans.

Odell sem er 25 ára gamall er fær píanóleikari og gaf út sína fyrstu plötu, „Long Way Down“ árið 2013. Sú plata fékk geysigóðar viðtökur og hlaut Brit verðlaunin sem eru verðlaun tónlistargagnrýnanda. Á tónleikunum 24. ágúst mun Odell flytja sín þekktustu og vinsælustu lög hingað til og lög af nýju plötinni „Wrong Crowd“.

Tom Odell hefur verið líkt við ýmsar stjörnur poppheimsins. Einhverjir hafa líkt honum við David Bowie við upphaf ferilsins. Einnig hafa einhverjir talið að með Tom Odell hafi komið fram hlekkurinn sem tengir saman Elton John og Coldplay, enda gegnir píanóið mikilvægu hlutverki í grípandi lögum Odell.
Athyglin sem Odell hefur vakið undanfarin ár hefur aukið eftirspurn eftir honum og sífellt stærri tónleikastaðir standa honum til boða. Tónleikar með honum í ekki stærri sal en Eldborgarsal Hörpu kunna því fljótlega að heyra sögunni til.

Þetta er í annað sinn sem Tom Odell heldur tónleika á Íslandi. Fyrri tónleikar hans voru í Hörpu í júní 2014 og varð uppselt á þá tónleika á örskotsstundu og skemmtu tónleikagestir sér konunglega. Miðasalan er hafin og má nálgast miða á tónleikanna hér.

Hér að neðan má sjá sýnishorn af tónlist Tom Odell:

[youtube https://www.youtube.com/watch?v=eZLYp-jgx-I&w=560&h=315][youtube https://www.youtube.com/watch?v=MwpMEbgC7DA&w=560&h=315]