Á Skólavörðustígnum blómstrar margvísleg starfsemi og þessi fallega gata iðar af lífi sérhvern dag. Í maí árið 2014 var opnuð gleraugnaverslunin 101 Optic að Skólavörðustíg 2 og er óhætt að segja að borgarbúar, sem og ferðamenn, hafi tekið versluninni vel. Hún býður enda upp á mörg af heitustu merkjunum í gleraugum í dag, sem og smart og tískulegar hágæðaumgjarðir.

Eigandi 101 Optic er Kristinn Kristinsson en hann er þaulvanur í gleraugnabransanum enda búinn að reka verslunina Gleraugað frá árinu 2000. Gleraugað er til húsa í Bláu húsunum í Faxafeni og Kringlunni. Kristinn stundaði nám í faginu í Danmörku. Er hann með réttindi til sjónmælinga og linsumælinga. Eftir nám starfaði Kristinn sem sjónfræðingur í Danmörku en árið 2000 flutti hann heim og keypti verslunina Gleraugað við Faxafen. Árið 2012 keypti hann gleraugnaverslunina Gleraugnasmiðjuna í Kringlunni og hún fékk þá nafnið Gleraugað. 101 Optic er síðan nýjasta verslun Kristins. Auk Kristins starfa í versluninni Guðjón Ingi Guðmundsson sjóntækjafræðingur og Sólrún Ingvadóttir sem áður starfaði í skartgripabransanum. Guðjón Ingi hefur 12 ára reynslu sem sjóntækjafræðingur og hefur starfað í faginu bæði á Íslandi og erlendis.

Mynd: Þormar Vignir Gunnarsson

Ítalskur stíll og þýsk gæði

Sem fyrr segir er 101 Optic framsækin verslun hvað strauma og stefnur í gleraugum og umgjörðum varðar. Um úrvalið í versluninni segir Kristinn:

„Við erum með flott merki frá Evrópu, einna helst Etnia Barcelona sem er eitt af heitustu merkjunum í gleraugum í dag. Einnig Blackfin sem eru hágæða títaníumumgjarðir frá Ítalíu, mjög smart og nýtískulegar umgjarðir. Þá erum við með Vinyl Factory sem er franskt merki, hipp og kúl í fallegum litum. Við vorum að fá nýtt merki inn frá sænska hönnuðinum Efva Attling. Porsche Design er vinsælasta merkið í sólgleraugum ásamt Ray-Ban og Marc Jacobs.

Glerin sem við seljum eru frá þýskum framleiðenda, Rodenstock, þetta er 140 ára gamalt þýskt fyrirtæki og hefur lengi verið annað af tveim bestu framleiðendum heims. Það er alkunna í gleraugnabransanum að bestu glerin koma frá Þýskalandi og hefur verið þannig frá upphafi, önnur lönd eru langt á eftir í gæðum.“

Mynd: Þormar Vignir Gunnarsson

Kristinn segir að fólk sem búi í miðbænum komi mikið í verslun hans en margir viðskiptavinir hans koma líka langt að. Þá verður verslunin sífellt vinsælli hjá erlendum ferðamönnum:

„Ég mæli með að fólk komi hérna við og skoði úrvalið. Við bjóðum upp á sjónmælingar og linsumátun, en það er mjög mikilvægt að fólk fái góða ráðgjöf þegar það byrjar að nota linsur,“ segir Kristinn.

101 Optic er opin virka daga frá kl. 9 til 18 og á laugardögum frá kl. 10–16. Tímapantanir í sjónmælingu eru í síma 511-2500.