Hátíð hafsins – Mikið um að vera fyrir utan Kaffivagninn
Nútíð og fortíð blandast saman með skemmtilegum hætti á Kaffivagninum, einum elsta og þekktasta veitingastað borgarinnar, en síðustu árin hefur verið lögð aukin áhersla á framsækna matargerð úr íslensku sjávarfangi á staðnum. Segja má að Kaffivagninn sé í dag þrískiptur staður, í fyrsta lagi býður hann upp á fjölbreyttan og framúrskarandi morgunverð, í öðru lagi er hann fiskréttastaður og í þriðja lagi kaffihús með kökum.
Kaffivagninn hefur frá árinu 2013 verið í eigu hjónanna Guðmundar Viðarssonar, sem er matreiðslumeistari staðarins, og Mjallar Daníelsdóttur. Á hverjum degi eru í boði 3–4 fiskréttir dagsins:
„Við leggjum mikla áherslu á fiskrétti og erum á þessum skandinavísku nótum. Flestir fiskréttirnir okkar eru bornir fram á pönnum. Einn af þessum pönnuréttum má kalla aðalsmerki Kaffivagnsins en það er þorskhnakki, gratíneraður með rækjum og bérnaise-sósu, Julian-grænmeti og kartöflum. Þetta er afar vinsæll réttur. Síðan erum við með gömlu góðu réttina sem við förum með upp á næsta stig. Þar má nefna plokkfisk, fiskibollur, bleikju og fiskisúpu. Þá erum við með smurbrauð með bleikju en fyrir þá sem alls ekki vilja fisk þá bjóðum við líka upp á smurbrauð með roast beef sem við poppum dálítið upp,“
segir Mjöll. Á Kaffivagninum er fastur matseðill sem gestir staðarins ganga að vísum en réttir dagsins eru hins vegar breytilegir frá degi til dags og ráðast algjörlega af því hvaða fiskur er í boði þann daginn. Ferskleikinn er í hávegum hafður á Kaffivagninum og eingöngu er boðið upp á splunkunýjan og ferskan fisk.
Eins og margir aðrir veitingastaðir í Reykjavík hefur Kaffivagninn ekki farið varhluta af fjölgun erlendra ferðamanna, sem vissulega sækja staðinn og setja skemmtilegan svip á hann. Íslendingar eru samt sem áður um 75% gestanna og hefur gestahópurinn orðið fjölbreyttari síðari árin, til dæmis hefur konum fjölgað mikið:
„Hingað koma afar og ömmur með barnabörnin, ungt fólk sækir mikið hingað og svo eru til dæmis kvennahópar sem mæta hingað á föstum tímum, til dæmis fyrsta þriðjudag í hverjum mánuði og svo framvegis,“ segir Mjöll.
Auk fiskréttanna hefur fjölbreyttur og girnilegur morgunverður Kaffivagnsins mikið aðdráttarafl. Má meðal annars gæða sér á lúxus-hafragraut, hrærðum eggjum, beikoni og eggjum, lax og ristuðu brauði.
Mjög vinsælt er að fá sér kaffi og kökur á Kaffivagninum en allar kökur eru bakaðar á staðnum.
Hátíð hafsins er haldin á Hafnarsvæðinu helgina 4.–5. júní. Þá er líf og fjör á Kaffivagninum og fullt út úr dyrum en gatan fyrir utan, Grandagarður, er lokuð fyrir bílaumferð.
„Það er afskaplega skemmtilegt að hafa þessa hátíð hér í götunni og að fólk fái að líta augum eitthvað af þeirri ótrúlega fjölbreyttu fæðu sem fæst úr sjónum. Það verða sýndar fjölmargar fiskitegundir í körum hér fyrir utan. Það verða tónlistaratriði og ýmsar skemmtilegar uppákomur. Björgun úr sjó verður sýnd og almennt dregið fram hvernig vinnan fór fram hér við höfnina í gamla daga,“
segir Mjöll. Nánar má fræðast um Hátíð hafsins á vefsvæðinu http://hatidhafsins.is/.
Kaffivagninn er að Grandagarði 10. Opið er alla daga vikunnar frá kl. 07.30 til 18.00. Heimasíðan er
www.kaffivagninn.is
