Ekki láta snjalltækin stýra fjölskyldulífinu
Á mörgum nútímaheimilum eyðir fjölskyldan, allt niður í smábörn, talsverðum tíma við skjái á degi hverjum. Tæknin er undursamleg, en samt er óneitanlega eitthvað örlítið bogið við að eins árs börn sitji og fletti myndum í snjallsímum án þess að nokkur hafi þjálfað þau til iðjunnar. Það læra börnin sem fyrir þeim er haft.
Á sumum heimilum eru skýrar reglur um skjátíma, en annars staðar ekki. Þó svo að ásetningur foreldra sé góður, er fjöldi heimila í landinu ofurseldur valdi snjalltækjanna. Málið snýst bæði um samskipti, samveru, og líkamlega virkni. Á meðan við sitjum hokin yfir tækjunum, erum við kannski að læra eitthvað um heiminn, en það er fátt á skjánum sem getur komið í staðinn fyrir mannleg tengsl og virkni í raunheimi.
Hér eru nokkur ráð fyrir foreldra sem vilja líta upp og gefa gott fordæmi. Horfa í augu barnanna sinna og nota tímann í annað en smáforrit og samfélagsmiðla.
Útskýrðu fyrir börnunum hvers vegna það er mikilvægt að hreyfa sig og leika sér úti – ferskt loft, sólarljós og líkamleg virkni utandyra. Margir telja að við eigum ekki að eyða meira en tveimur klukkustundum við skjá á degi hverjum, umfram það sem við þurfum vegna náms eða vinnu.
Sumir foreldrar nota skjátíma sem gjaldmiðil til að fá börn til að gera eitthvað, eða hóta minni skjátíma til að fá þau til að láta af óæskilegri hegðun. Með þessu fær skjátíminn óþarflega mikið vægi í huga barnsins.
Settu húsreglur um skjátíma, eða skjálausan tíma. Þú þarft að vera góð fyrirmynd og fara eftir reglunum. Þegar börnin sjá þig fara eftir reglunum, eru þau líklegri til að leggja sig fram við það líka. Ein leið gæti verið að gefa hverjum fjölskyldumeðlimi tvær klukkustundir við skjá, eftir skóla eða vinnu. Öðrum hefur gefist vel að hafa tölvulausan tíma milli 16 og 20 á degi hverjum, svo dæmi sé nefnt.
Tíminn við skjáinn líður oft ansi hratt og áður en við vitum er kominn háttatími! Það er þess vegna ágætt að skrásetja tímann sem hver fjölskyldumeðlimur notar við skjáinn annars vegar, og hins vegar í líkamlega virkni, eins og gönguferðir, tiltekt, íþróttir, og leik. Prófið að taka eina viku í verkefnið. Ef í ljós kemur að einhver notar meiri tíma við skjá en í virkni er hægt að hjálpast að við að setja markmið til að snúa því við.
Þetta hafa nú flestir heyrt áður. En það er sérlega góð hugmynd að gera öll svefnherbergi að skjálausum svæðum. Birtan af snjall- og tölvuskjáum er sérstaklega slæm fyrir svefninn og í svefnherbergjum á að ríkja ró og slökun.
Þeir sem eyða stórum hluta af frítíma sínum við skjái, eru jafnvel búnir að gleyma ýmsu öðru sem heimurinn býður upp á. Gefðu börnunum hugmyndir um skemmtilega hluti sem hægt er að gera í staðinn.
Sameiginlegar máltíðir fjölskyldunnar eru tilvalinn vettvangur fyrir spjall. Ef allir sammælast um að skilja snjalltæki eftir utan eldhússins, og slökkva á sjónvarpinu, verða þær enn ánægjulegri. Rannsóknir hafa sýnt að fjölskyldur sem snæða saman eru líklegri til að borða hollari mat. Reynið að hafa að minnsta kosti eina sameiginlega máltíð á dag sem býður upp á spjall og samveru.
