Casi var búin að vera heima í fimm mínútur þegar ógæfan dundi yfir öðru sinni
Íbúar Kansas í Bandaríkjunum eru margir harmi slegnir eftir að ung móðir féll frá sviplega fyrir skemmstu. Aðeins rúmri viku áður hafði konan, hin 36 ára Casi Rott, eignast þríbura. Fyrir átti Casi tvö börn með eiginmanni sínum, Joey Rott.
Casi eignaðist þríburana þann 29. janúar en þá var hún gengin 34 vikur. Allt virtist vera í himnalagi fyrstu dagana eftir fæðinguna, eða þar til Casi fór að finna fyrir verkjum í brjósti. Í ljós kom að hún var með blóðtappa í lungunum, svokallað lungnasegarek.
Þar sem Casi gekk með þríbura var meðgangan talsverð þrautarganga og hætta á fyrirburafæðingu fyrir hendi. Casi þurfti af þeim sökum að taka því rólega síðustu þrjá mánuði meðgöngunnar þar sem hún var nánast rúmliggjandi. Þar sem Casi og Joey bjuggu nokkuð langt frá næsta sjúkrahúsi, nánar tiltekið í bænum Clay Center, dvaldi Casi á heimili bróður síns í Wichita í Kansas síðustu vikur meðgöngunnar. „Það eina sem vakti fyrir okkur var að hún myndi ganga með þá sem allra, allra lengst. Hún stóð sig vel, hélt út fram í 34. viku,“ segir Joey.
Þríburarnir voru teknir með keisaraskurði og segir í frétt ABC News að aukin hætta á blóðtappa sé fylgifiskur slíkrar aðgerðar. Það var svo þann 8. febrúar, rúmri viku eftir að hún eignaðist þríburana, að Casi fékk að fara heim af sjúkrahúsinu til Clay Center. Læknar töldu hana vera á góðum batavegi og Casi var orðin verkjalaus. Það voru því miklir fagnaðarfundir þegar Casi hitti stúlkurnar sínar tvær sem hún hafði ekki séð í nokkrar vikur.
Gleðin varð þó skammvinn því hún hafði ekki verið heima nema í um fimm mínútur þegar verkirnir í brjóstinu fóru aftur að gera vart við sig. „Við fórum strax á sjúkrahús þar sem hún lést nokkrum klukkustundum síðar,“ segir eiginmaður hennar, Joey, í samtali við ABC. Í ljós kom að hún hafði aftur fengið blóðtappa sem leiddi hana að lokum til dauða.
Vinir og vandamenn fjölskyldunnar hafa sett á fót styrktarsíðu á vefnum GoFundMe sem hefur það að marki að styðja fjárhagslega við bakið á Joey og börnunum fimm. Nú þegar aðeins nokkrir dagar eru liðnir frá opnun síðunnar hafa tæplega 100 þúsund Bandaríkjadalir safnast, tæpar 13 milljónir króna.
