NP kaffi, Garðatorgi 7 í Garðabæ, var opnað í janúar á þessu ári, og er í senn sushi-staður og kaffihús. Garðbæingar og aðrir íbúar höfuðborgarsvæðisins hafa tekið staðnum fagnandi en NP kaffi er rómað fyrir bæði framúrskarandi sushi og afbragðsgott kaffi.

Kaffið sem drukkið er á NP kaffi er Chaqwa sem Vífilfell flytur inn. Chaqwa inniheldur bragðmiklar hágæðakaffibaunir frá ýmsum heimshornum, meðal annars Mið-Ameríku, Austur-Afríku, Indlandi og Indónesíu.

Mörgum gestum NP kaffis þykir afar gott að fá sér bolla af rjúkandi Chaqwa eftir sushi-máltíðina. Einnig koma margir sem ekki eru endilega að sækjast eftir sushi heldur kaffinu góða og notalegri kaffihúsastemningunni sem ríkir á staðnum. Auk sushi eru ýmsir smáréttir í boði, til dæmis samlokur. NP kaffi er með vínveitingaleyfi og margir fá sér bjór eða léttvín, sérstaklega undir kvöldið.

Eigandi NP kaffis er Nimit Thaitrasert. Hann er frá Taílandi en talar reiprennandi íslensku enda hefur hann búið hér á landi í hátt á þriðja áratug. Nimit hefur langa reynslu af veitingarekstri og starfaði meðal annars á veitingastaðnum Tælandi við Laugaveg. Einnig hefur hann starfað á hinum vinsæla stað Noodle Station sem bróðir hans rekur við Laugaveg.

Nimit segir að fólk borði gjarnan hádegismat á staðnum en síðan séu aðrir sem fái sér kaffi og kökusneið síðdegis. Enn aðrir koma í kvöldmat og fá sér gjarnan vínglas með matnum. Loks eru þeir sem panta sushi og sækja. Það ríkir því töluverð fjölbreytni á þessum huggulega, nýlega stað í hjarta Garðabæjar.