Hugmyndir að hollum mat sem bætir heilsuna – Best er að borða grænmeti hrátt
Það eru fastir liðir eins og venjulega að fólk setji sér markmið á nýju ári, og þá gjarnan hvað mataræðið varðar. Að snúa til betri vegar, viðhafa heilbrigðari lífsstíl og borða hollari mat getur bara verið af hinu góða. En gott er að hafa í huga að fara ekki of geyst af stað í breytingarnar, því það er alltaf hætta á því að slíkt flas verði fólki að falli.
Það er um að gera að byrja á því að skipta óhollari fæðu út fyrir hollari hægt og rólega og gera þannig nýja fæðu að fastri breytu í mataræðinu á sem eðlilegast hátt. Hér eru nokkur dæmi um einstaklega holla fæðu sem ætti að vera hluti af mataræði þínu á nýju ári.
Spínat ætti að vera sem oftast á borðum, en rannsóknir hafa meðal annars sýnt að það geti spornað við sykursýki 2. Þá er spínat uppfullt af vítamínum sem eru líkamanum nauðsynleg. Best er að borða spínatið hrátt eða létt gufusoðið til að vítamínin fari ekki til spillist. En svo eru að sjálfsögðu til margir góðir réttir sem þarf að fullelda, en innihalda spínat. Það er þó alltaf betra en ekkert spínat.
Möndlur eru klárlega hollasta snakkið, en þó ber að varast að borða of mikið af þeim. Þær eru ríkar af hollri fitu sem draga úr og viðhalda eðlilegu magni kólesteróls í blóð. Þar fyrir utan eru þær uppfullar af vítamínum, steinefnum og trefjum
Avókadó eða lárpera er með því hollara sem þú getur borðað. Að borða eitt avókadó á dag kemur heilsunni í lag – eða allt að því. Það getur allavega bætt hana verulega. Ávöxturinn er mjög fituríkur og um 75 prósent af kalóríunum sem þú færð úr avókadó koma úr fitu. Þar er hins vegar um holla fitu að ræða sem gerir líkamanum gott. Þá er avókadó ein trefjaríkasta fæða sem þú getur innbyrt og því sérlega gott fyrir meltinguna.
Að borða hafragraut á hverjum morgni er allra meina bót. Það er sérstaklega gott fyrir þá sem eru með of hátt kólesteról í blóðinu því rannsóknir hafa sýnt fram á að með neyslu á haframjöli sé hægt að lækka það. Haframjölið er líka ríkt meðal annars af B-vítamíni og Omega-3 fitusýrum
Brokkolí eða spergilkál er sérstaklega ríkt af trefjum, kalsíum og ýmsum öðrum vítamínum, eins og C-vítamíni. 100 grömm af spergilkáli gefa af sér um 150 prósent af daglegri C-vítamín þörf einstaklings. Rannsóknir hafa sýnt fram á að neysla á spergilkáli geti dregið úr líkum á hjartasjúkdómum, sykursýki 2 og ákveðnum tegundum af krabbameini. Það ber hins vegar að varast að elda spergilkálið of mikið því þá tapast flestöll næringarefnin.
Það er mjög gott að neyta ýmiss konar berja mjög reglulega. Til dæmis bláberja. Þau eru rík af trefjum og andoxunarefnum og talið er að neysla á bláberjum hafi jákvæð áhrif á of háan blóðþrýsting – geti lækkað hann um allt að 10 prósent. Þá hafa rannsóknir sýnt fram á að eldra fólk sem neytir reglulega bláberja er ólíklegra til að þróa með sér elliglöp en jafnaldrar þess sem gera það ekki. Það virðist að minnsta kosti ekki gerast jafn hratt.
Lax og annar feitur fiskur ætti að vera á borðum einu sinni eða tvisvar í viku. Jafnvel oftar. Hann er fullur af Omega-3 fitusýrum sem hafa jákvæð áhrif á hjarta- og taugakerfið. Neysla á feitum fiski er líka talin sporna gegn liðagigt.
Sætar kartöflur eru ríkar af trefjum, karótíni, flóknum kolvetnum og fjölda vítamína. Fyrir vikið eru þær frábær orkugjafi og ekki skemmir fyrir hvað þær eru einstaklega góðar.
