Dýralæknir segir sína skoðun
Sumir freistast til þess að missa mat á gólfið þegar heimilishundurinn er að sniglast í kringum matarborðið á matmálstíma. Þeir sem halda reglu vita þó sem er að hundar eiga það til að ganga á lagið og því er þetta oft bundið við þá sem ekki vita betur, til dæmis börn eða þá sem eru gestkomandi.
Matur ætlaður mannfólki getur farið misjafnlega í hunda og það er engin tilviljun að til er sérstakt hundafóður sem ætlað er dýrunum. Barbara Royal er dýralæknir og pistlahöfundur á vefsíðunni Ophrah.com, en hún skrifaði á dögunum pistil sem vakið hefur talsverða athygli. Þar fer hún yfir og tekur dæmi um þann mat sem getur beinlínis reynst skaðlegur fyrir hunda.
Royal segir að hún hafi fengið marga hunda til sín sem veikst hafa eftir neyslu á hnetusmjöri. Eins og mannfólkið geta hundar fengið ofnæmi ef þeir innbyrða hnetur. Hundum finnst hnetusmjör gott en Barabara ráðleggur fólki frá því að gefa þeim hnetusmjör.
Fólk er misjafnlega hrifið af skorpunni, eða endanum, á pítsum og oft eru þær skildar eftir. Barabara segir að fólk ætti að forðast það eins og heitan eldinn að leyfa heimilishundinum að éta skorpuna, meðal annars af þeirri einföldu ástæðu að hún inniheldur hveiti og fleiri efni sem fer ekki vel í meltinguna.
Royal hvetur fólk til að standast freistinguna þegar kemur að því að gefa hundinum kartöfluflögur. Kartöfluflögur innihalda mikið af salti og raunar hvetur Royal fólk til að þess að gefa hundunum ekkert sem inniheldur mikið af salti, hvort sem um er að ræða kartöfluflögur, saltkringlur eða unnar kjötvörur.
Það gerir hundum meiri skaða en það gerir þeim gott að innbyrða sælgæti eða kex. Það inniheldur alla jafna mikinn sykur sem gerir hundum – og öðrum dýrum – ekkert gott. Að sjálfsögðu er súkkulaði á algjörum bannlista enda getur það beinlínis reynst hættulegt fyrir hunda.
Royal mælir með því að fólk láti skynsemina ráða för þegar kemur að því að gefa hundunum að borða. Hreint kjöt er líklega best þegar þú vilt gera vel við hundinn, en annars hefðbundið hundafóður. Hún segir að það sama gildi um ketti sem þurfa að éta prótín- og fituríkt fóður en ekki mikið af kolvetnum. Aðeins 5-10 prósent af hitaeiningunum ætti að koma úr kolvetnum, að mati Royal.
