Heilsustofnun Náttúrulækningafélags Íslands (NLFÍ) í Hveragerði býður upp á ýmiss konar námskeið sem eru öllum opin. Þau stuðla að árangri dvalargesta við endurhæfingu, forvarnir og aðlögun að daglegu lífi eftir áföll, veikindi eða sjúkdóma. Ingi Þór Jónsson markaðsstjóri segir Heilsustofnun bjóða upp á einstaklingsmiðaðar meðferðir og trausta og faglega þjónustu.

Nýjustu aðferðir í nútíma læknisfræði og náttúrulækningar

„Við veitum gestum alhliða heilsueflingu með því að veita andlega og líkamlega endurhæfingu,“ segir Ingi. „Jafnframt kennum við dvalargestum að bera ábyrgð á eigin heilsu, andlegri og líkamlegri, ásamt því að bæta færni og þátttöku þeirra í daglegu lífi,“ bætir hann við. Ingi nefnir að notast er við nýjustu aðferðir í nútíma læknisfræði í bland við ýmsar hefðir svo sem leir- og heilsuböð og grænmetisfæði. „Einnig er boðið upp á heilsueflingu með hvíldar- og hressingardvöl,“ segir hann.

Ný námskeið að hefjast hjá Heilsustofnun NLFÍ

„Við erum einnig með ýmiss konar námskeið í boði fyrir almenning sem vill koma í styttri dvöl án beiðni frá lækni,“ segir Ingi. „Sem dæmi má nefna námskeiðið Komdu með, sem snýst um að kenna einstaklingum að bera ábyrgð á eigin heilsu og að setja sér markmið, Úrvinnsla áfalla, Líf án streitu, Ritmennska, þar sem kennd er skapandi aðferð gegn þunglyndi, Sorgin og lífið, vikudvöl fyrir þá sem misst hafa ástvin, Samkennd, sem snýst um að styrkja sig innan frá, og Núvitund eða Mindfulness, sem notað er gegn verkjum, kvíða, þunglyndi og streitu,“ segir Ingi. „Öll framan nefnd námskeið eru kennd á þessari önn,“ bætir Ingi við. Allar nánari upplýsingar um námskeiðin má finna á heimasíðu Heilsustofnunarinnar