Sölt, sæt og súr – Hentar við flest tækifæri
Þessi dásamlega baka er frábær sem léttur sumarkvöldverður, hádegisverður með salati, dögurður með sneiddum reyktum laxi, forréttur ein og sér, á hlaðborði eða í lautarferð.
Tilvalið er að nota þann ost sem er í uppáhaldi hjá fjölskyldunni. Hér er osturinn ekki sparaður, enda er þetta alvöru ostabaka.
Botn
3 dl hveiti
Fíngurklípa af salti
125 g smjör, nýtekið úr kæli
2 tsk. kúmínfræ
1–2 msk. vatn
Blandið saman hveiti, salti og kúmínfræjum í skál. Skerið smjörið í nokkra bita og bætið í skálina. Myljið saman smjörið og þurrefnin svo úr verði deig. Bætið við einni matskeið af köldu vatni, svo deigið verði mótanlegt. Magnið sem þarf af vatni fer eftir því hversu vel deigið tekur við og hitastiginu þar sem þið eruð að hnoða, mögulega þarf aðra matskeið af vatni.
Nú er tekið fram bökuform eða kökuform með hringlaga kanti sem má taka af. Ef slíkt er notað er ágætt að setja bökunarpappír í botninn svo auðveldara sé að ná bökunni úr eftir bakstur.
Deiginu er svo þrýst í botn og hliðar formsins og sett inn í frysti í 10 mínútur. Hitið ofn í 200 gráður á meðan. Að 10 mínútum liðnum er deigklætt formið tekið úr frysti og gafall notaður til að búa til nokkur göt í botninn. Bakað í ofni í 10 mínútur.
Fylling
Blandið eftirfarandi saman:
3 egg
2 dl rjómi
2 dl ab-mjólk, súrmjólk eða sýrður rjómi
6 dl rifinn, harður ostur (Västerbottenostur, Tindur eða annar áþekkur)
Blöndunni er hellt í forbakaða deigformið og bakað áfram við sama hitastig í 30–40 mínútur til viðbótar.
Bakan bragðast dásamlega heit, volg eða köld. En það sem toppar það algjörlega er rauðlaukssultan sem er löguð samhliða bakstrinum.
2–3 rauðlaukar, afhýddir og skornir í ræmur
½ dl sykur
½ dl hunang
½ dl rauðvínsedik
½ dl rauðvín
1 tsk. krydd að eigin vali, rósmarín, lambakryddblanda eða annað sem til er í kryddskápnum.
Blandið öllu saman í pott og leyfið að ná hægri suðu. Látið malla í um 10–20 mínútur og kælið áður en sultan er borin fram með ostabökunni.
