Ragnar gefur foreldraráð á Facebook – Fullur metnaðar!
Fyrirmyndarfaðirinn Ragnar hefur vakið athygli að undanförnu með uppeldisráðum sem hann birtir á Facebook. Ráðin hans Ragga eru kannski örlítið óvenjuleg, í það minnsta frumleg. Blaðakona DV, sem er margra barna móðir og amma, ákvað að ná tali af Ragga og grennslast fyrir um það nýjasta í barnauppeldi. Það er ekki víst að Raggi verði fenginn sem fyrirlesari á næsta fræðslufundi Hjallastefnunnar, en spjallið var engu að síður athyglisvert!
Hvernig byrjaði þetta?
„Þetta byrjaði allt þegar ég fór með strákinn minn í frí til Bene um daginn. Hann var því miður sárlasinn og auðvitað ekki í neinu ástandi, en þar sem ég var tímabundinn og ekki með samþykki móður hans fyrir ferðalaginu, þá varð hann að láta sig hafa það. Mér var hins vegar illa við að sjást með svona fölu barni utandyra og datt í hug að prófa að sleppa sólaráburði á andlit hans og viti menn! Það lifnaði svona svakalega yfir drengnum og hann varð eldrjóður í kinnum á svipstundu. Þetta var alveg geggjuð ferð.“
En gaman. Hvað er drengurinn þinn gamall?
„Hann er svona 3–4 ára, kannski 5, en lítur út fyrir að vera miklu yngri, og það skiptir máli. Ég náði nefnilega að koma honum út á ungbarnaverði sem er nánast frímiði. Maður fær samt að taka alveg heila aukatösku með, sem ég þurfti. Sérstaklega fyrir heimferðina.“
Gott er að halda skrá yfir svefnvenjur barnanna. Nái þau ótrufluðum nætursvefni í yfir 65 prósentum tilvika er fullkomlega óhætt að sleppa pössun þegar farið er út. Verið bara viss um að vera komin heim nógu snemma til að kveikja á barnatímanum, nema barnið sé nógu stórt til að kveikja sjálft, þá má alveg sleppa sér almennilega.
Gott ráð er að láta sem barnið hverfi við að væla. Næst þegar það grætur, prófið að láta sem það hafi gufað upp. Hlaupið um og kallið nafn þess þangað til vælið hættir; ekki fyrr. Þá fyrst verður barnið „sýnilegt“ aftur.
Mikilvægt er að minna börnin reglulega á að þið elskið þau. En gott er að nýta tækifærið til kennslu og útskýra að „ást“ er einungis líffræðilegt fyrirbæri hannað til þess að foreldrum séu ekki sama um örlög barna sinna og kjósi að halda þeim á lífi. Fleiri ráð síðar.
En svo deildir þú þessu ráði á Facebook?
„Einmitt. Ég var svo ánægður með útkomuna að ég ákvað að dúndra þessu inn og viðbrögðin létu ekki á sér standa. Ég hef mikið velt fyrir mér uppeldi síðustu árin og fundið ýmsar sniðugar lausnir, og mér finnst frábært að geta deilt þeim með heiminum og hjálpað öðrum foreldrum. Það hafa margir sagt að ég sé frábær pabbi.“
Hvernig viðbrögð hefur þú fengið?
„Mjög góð. Vægast sagt. Auðvitað eru einhverjir besservisserar þarna úti sem þykjast vita betur. En við skulum ekki gleyma því að hvert barn er einstakt og það sem virkar á börn getur verið einstaklingsbundið. Þessi ráð eru þó öll „tried and tested“ á mínum börnum og ég get lofað árangri þar, sért þú að passa þau. Sem ég er reyndar að leita eftir, svona svo að fólk viti.“
Áttu mörg börn?
„Mér finnst mjög gaman að veita ráð. Ég hef sterkar skoðanir á uppeldi og finnst ég hafa náð vissum tóni í mínum ráðum sem aðrir hafa ekki þorað að nefna. Það ríkir viss þöggun um erfiðar hliðar foreldrahlutverksins. Í raun er algerlega tabú að segja eitthvað annað en að þetta sé bara dans á rósum. Ég hef alls ekki bara góða reynslu af mínum börnum, þó að þau hafi vissulega veitt mér vissa ánægju. En heiðarleiki milli foreldra þykir mér mikilvægur og finn fyrir miklu þakklæti fyrir mína rödd í umræðunni.“
Hvernig uppeldi fékkst þú sjálfur?
„Alveg ágætt. Var yngstur af einum. Smá grín. Mamma sá mestmegnis um þetta sjálf og stóð sig alveg prýðilega. Mér þykir samt gott að geta veitt henni ýmis ráð núna og leiðrétt ýmislegt, bæði þegar hún er að passa barnabörn sín og líka ábendingar um hvað hefði getað farið betur í mínu uppeldi. Ætli ég geti ekki rakið flesta kvilla mína til æskunnar. Þess vegna er svo mikilvægt að gera þetta rétt.“
En þú sjálfur. Áttu mörg börn?
„Það var sérstaklega ein athugasemd á ráð frá mér sem hitti mig beint í hjartastað. Hún var frá einstæðum föður eins og mér sem hafði verið smeykur við að skjótast út þó að börnin væru sofandi. Til dæmis bara út í búð eða eitthvað. Það kom honum mjög á óvart hversu lengi má skilja ung börn eftir án vandræða. Ef þau eru sofandi það er að segja. Talsvert styttra annars. Ég og hann erum ágætis vinir í dag og förum stundum í „keppni“ þar sem við reynum að slá met hvor annars. Ég á enn metið.“
Nú hafa þessi ráð undið upp á sig og þú jafnvel orðaður við uppeldisbók?
„Já. Það hafa þónokkuð margir haft samband og viljað gefa þetta út. Það þarf samt að gera þetta rétt. Ég veit að þetta yrði vinsæl bók og ábyrgð mín er mikil. Ef komandi kynslóðir verða aldar upp samkvæmt ráðum mínum þá er betra að setja smá hugsun í þau, þó svo að mikilvægasta ráð mitt til foreldra sé að hlusta bara á eigið innsæi og ekki láta neinn segja sér að einhver ein uppeldisleið sé betri en önnur. Uppeldi er listform og ekki öllum gefið. Þess vegna er gott að fá góð ráð.“
