„Ég var búin að horfa á þetta starf úr fjarska í tíu ár áður en ég gerðist útfararstjóri. Mér þótti þetta vera virðulegt og fallegt starf. Ég efast um að nokkuð hafi komið mér á óvart. Þetta er vissulega erfitt og krefjandi – en getur líka verið afar gefandi.“

Þetta segir Harpa Heimisdóttir, eigandi Hörpu útfararstofu, Kirkjulundi 19, Garðabæ. Stofan var stofnuð árið 2014 og er eina útfararstofan í Garðabæ. Harpa þjónar öllu höfuðborgarsvæðinu ásamt nærsveitum ef þess er óskað. Harpa er eini starfsmaður stofunnar í fullu starfi en auk þess nýtur hún aðstoðar þegar á þarf að halda.

Blaðamaður verður þess áskynja að Harpa hefur fundið sinn rétta stað í tilverunni, ef svo má að orði komast, með því að gerast útfararstjóri, og hún starfar af hugsjón. Starfið er vandasamt því ekki er rúm fyrir mistök:

„Þetta er afar viðkvæm þjónusta þar sem ekkert má fara úrskeiðis. Þegar andlát ber að höndum verð ég með vissum hætti hluti af hinni syrgjandi fjölskyldu sem kemur saman og ræður ráðum sínum, í gegnum kistulagninguna og útförina,“ segir Harpa, en traust og nærgætni eru meðal lykilþátta í starfinu:

„Fólk verður að geta treyst manni og maður tengist því persónulegum böndum. Besta staðfestingin á því að maður sé að gera rétt finnst mér vera þegar fólk leitar til mín aftur um útfararþjónustu.“

Mynd: Þormar Vignir Gunnarsson

Harpa útfararstofa notar meðal annars vistvænar líkkistur sem smíðaðar eru hérlendis og hannaðar af íslenska líkkistusmiðnum Þorsteini B. Jónmundssyni. Þær þykja fallegar, eru ekki málaðar heldur fær viðurinn að njóta sín.

Þess má geta að Harpa útfararstofa gefur alla vinnu við fósturlát og lát ungbarna.

Ítarlegar og aðgengilegar upplýsingar um þjónustuna er að finna á heimasíðunni http://harpautfor.is/