WOW air flaug sitt fyrsta flug til Edinborgar í gær. Flogið verður til Edinborgar tvisvar í viku, á miðvikudögum og sunnudögum út október.

Vel var tekið á móti farþegum úr jómfrúarflugi WOW air til Edinborgar. Þar mætti þeim skoskur sekkjapípuleikari í fullum skrúða sem spilaði skosk þjóðlög við góðar undirtektir nærstaddra.

„Við erum mjög ánægð með að bæta Edinborg við áfangastaði okkar sem nálgast nú þriðja tug. Þessi borg hefur heillað margan ferðamanninn í gegnum tíðina enda einkennist hún bæði af litríkri menningu og einkar gestrisnu fólki,“ segir Skúli Mogensen stofnandi og forstjóri WOW air.

„Við bjóðum WOW air hjartanlega velkomin á Edinborgarflugvöll. Ísland er áfangastaður sem nýtur síaukinna vinsælda meðal skoskra ferðamanna,“ segir Gordon Dewar framkvæmdastjóri Edinborgarflugvallar.

Edinborg er höfuðborg Skotlands og einn vinsælasti áfangastaður Bretlandseyjar á eftir Lundúnum. Edinborg er mikil menningarborg en hún hefur vakið athygli fyrir að halda eina stærstu listahátíð heims, Edinburgh Festival Fringe, sem fram fer í ágúst og stendur yfir í 25 daga. Þá skartar Edinborg einnig ríkri sögu auk þess sem hagkvæmt er að versla þar.