Uppskriftir úr nýrri bók Nönnu Rögnvaldar
Nýlega kom út bókin Eitthvað ofan á brauð eftir Nönnu Rögnvaldardóttur. Nanna er þjóðkunn fyrir sitt matargrúsk og góðu uppskriftir, en bókin er sú tuttugasta og fyrsta sem hún gefur út um mat. Nýja bókin inniheldur, eins og titillinn gefur til kynna, uppskriftir að ýmsu sem hægt er að hafa ofan á brauð.
Hvort sem saumaklúbbur, kósíkvöld eða veisla er í vændum, er örugglega ýmislegt í bókinni sem gæti glatt bragðlaukana.
Við fengum góðfúslegt leyfi til að birta þessar girnilegu uppskriftir úr bókinni.
Nanna segir: „Egg og avókadó eiga býsna vel saman. Hér eru eggin söxuð í mylsnu og það þarf lítið af bindiefni til að halda salatinu saman – ég notaði sýrðan rjóma en það mætti líka nota gríska jógúrt. Nú, eða majónes. Í staðinn fyrir timjan mætti nota aðrar kryddjurtir, t.d. dill, kóríanderlauf eða steinselju.“
3 egg, harðsoðin
1 lítill hvítlauksgeiri, saxaður
3 msk. graskersfræ, blöð af nokkrum timjangreinum
2 msk. sýrður rjómi
1 tsk. dijonsinnep, eða eftir smekk
1 tsk. nýkreistur sítrónusafi, eða eftir smekk pipar, salt
1 avókadó (125 g), vel þroskað
Skurnflettu eggin, saxaðu þau gróft og settu þau svo í matvinnsluvél ásamt hvítlauk, graskersfræjum og timjani, og láttu hana ganga þar til eggin eru orðin að mylsnu. Hrærðu saman í skál sýrðum rjóma, sinnepi, sítrónusafa, pipar og salti eftir smekk og hrærðu svo eggjablöndunni saman við.
Skerðu avókadóið í litla bita og blandaðu þeim saman við. Settu salatið á brauðsneiðar eða í samlokur, e.t.v. með sneiðum af harðsoðnu eggi, og skreyttu með timjani.
Nanna segir: „Þetta er uppáhalds sæta samlokan mín. Reyndar nota ég ekki lengur hunang en hún er nú ágæt fyrir því …“
3 msk. heslihnetur (eða aðrar hnetur)
125 g bláber
1 msk. hunang
¼ tsk. þurrkað timjan, nýmalaður pipar, kotasæla
2 smjördeigshorn e.t.v. ferskt timjan til að skreyta með
Byrjaðu á að rista hneturnar á þurri, meðalheitri pönnu í nokkrar mínútur og helltu þeim síðan á disk. Láttu þær kólna dálítið og grófsaxaðu þær svo.
Hitaðu grillið í ofninum. Settu berin í lítið, eldfast mót, dreyptu hunanginu
yfir og stráðu svo timjani og dálitlum pipar yfir. Settu þetta undir grillið
í 5–6 mínútur, eða þar til berin eru mjúk og hunangsgljáð. Taktu þau þá út en ristaðu smjördeigshornin (skorin í sundur og skurðflöturinn látinn snúa upp) undir grillinu í 1–2 mínútur.
Settu neðri hluta hornanna á diska, settu væna skeið af kotasælu ofan á og síðan 1–2 kúfaðar skeiðar af bláberjum. Stráðu hnetum yfir og skreyttu e.t.v. með timjani. Leggðu efri hlutann af horninu ofan á.
