Sumarbúðir KFUM og KFUK eru vinsæll valkostur barna og unglinga á hverju sumri. Flestir dvalarflokkar eru 5–7 daga langir og er boðið upp á fjölbreytt úrval aldursskiptra flokka fyrir krakka á öllum aldri. Það er margt í boði í sumarbúðunum og tíminn flýgur áfram við leik og störf.

„Hópleikir, íþróttir, útivera, listsköpun, bátsferðir, söngur, leikrit og svo ótal margt fleira er meðal þess sem krakkarnir fá að gera í sumarbúðunum og að sjálfsögðu er það líka breytilegt eftir aldri og að einhverju leyti ólíkt á milli sumarbúða,“ segir Jóhann Þorsteinsson, æskulýðsfulltrúi hjá KFUM og KFUK.

Sumarbúðir KFUM og KFUK eru fimm talsins, Vatnaskógur, Vindáshlíð, Kaldársel, Ölver og Hólavatn. Að auki býður félagið upp á leikjanámskeið í Kópavogi og í Reykjanesbæ þar sem krakkarnir geta komið að morgni og farið heim síðdegis. Nú þegar hafa tæplega tvö þúsund börn verið skráð fyrir sumarið en búast má við að um þúsund börn bætist í þann hóp áður en fjörið byrjar í júní.

Saga sumarbúða KFUM og KFUK er tæplega hundrað ára og það er því næsta öruggt að starfið byggir á mikilli reynslu, „en markmiðið er alltaf það sama, að efla þroska einstaklingsins til líkama, sálar og anda,“ segir Jóhann.

Allar frekari upplýsingar um sumartilboð KFUM og KFUK má fá í síma 588-8899 og á heimasíðu félagsins kfum.is.

Heimasíða