Námskeið fyrir ungt hugvitsfólk – Virkjun sköpunargáfu og eflandi athafnir
INNOENT Education á Íslandi er menntafyrirtæki sem leggur áherslu á að virkja hugvit og sköpun hvers einstaklings í gegnum skapandi kennsluhætti og leik. Hugmyndafræði INNOENT byggist fyrst og fremst á óbilandi trú okkar á hugviti komandi kynslóða og áratuga rannsóknum á kennslufræði og þróun menntunar, þar sem lögð er áhersla á að menntun miði að því að virkja rannsóknarþörf hvers og eins og gefa nemendum stað og stund til að fræðast í gegnum rannsókn og reynslu.
„INNOENT vinnur eftir öllum grunnþáttum aðalnámskrár grunnskóla; sköpun, sjálfbærni, tækni-, list-, hönnunar- og verklæsi, jafnrétti, lýðræði og mannréttindi og heilbrigði og vellíðan, með áherslu á sköpun, sjálfbærni
virðingu og vellíðan,“ segir Þórdís Sævarsdóttir, skólastjóri INNOENT Education á Íslandi.
„INNOENT hefur verið til um tíma og verið að þróast en hefur núna starfrækt námskeið í rúmt ár. Veturinn 2015–2016 voru nemendur INNOENT uppfinningaskólans alls 170 grunnskólanemendur í Reykjavík, Hafnarfirði, Kópavogi og Garðabæ. Segja má með vissu að árangur unga hugvitsfólksins í vor hafi farið fram úr björtustu vonum þar sem lögð voru fram líkön og frumgerðir af hugmyndum og lausnum til marks um hæfileika framtíðarinnar.“
Þórdís segir að nú bjóði INNOENT í fyrsta skipti upp á skemmtilegt sumarnámskeið fyrir ungt hugvitsfólk undir yfirskriftinni Skapandi fjör fyrir flinka krakka:
„Markmið INNOENT á Íslandi er að efla frumkvæði og sköpunargáfu ungmenna með eflandi kennsluaðferðum. Námskeiðin eru ætluð öllum börnum á aldrinum 5–12 ára og eru haldin í Lækjarskóla í Hafnarfirði (gamla skólanum). Lögð er áhersla á skapandi hugsun hvers og eins, skemmtilegar uppfinningar, samvinnu, leiki og gleði. Nærumhverfi verður nýtt til útiveru, rannsókna, efnisöflunar og leikja. Hver vika hefur þema sem einkennir viðfangsefni vikunnar. Við verðum bæði inni og úti í vinnu okkar og flinku fikti en aðaláherslan verður á gleði og eflandi athafnir,“ segir Þórdís og bendir áhugasömum á að sjá nánari upplýsingar á heimasíðunni www.innoent.is
