Fyrirtækið Nesbúegg ehf. fékk fyrr á þessu ári vottun um lífræna eggjaframleiðslu. Vottunarstofan Tún staðfesti formlega að Nesbúegg uppfyllti allar kröfur og reglur um framleiðslu á lífrænum eggjum. Þetta voru mikil tímamót í matvælaframleiðslu á Íslandi því Nesbúegg ehf. er fyrsta framleiðslufyrirtækið á sínu sviði hérlendis sem hlýtur slíka vottun. Lífræn egg frá Nesbúeggjum fást í öllum helstu matvöruverslunum.

Lífræn egg eru hrein afurð enda er fuglafóðrið sem varphænurnar eru aldar á lífrænt, óerfðabreytt og framleitt á umhverfisvænan hátt. Engin lyf eða hormón eru notuð til að auka vöxt eða afurðir dýranna.

Þeir sem kaupa lífræn egg stuðla jafnframt að dýravelferð enda eru hænurnar sem verpa þessum eggjum frjálsar og búa við góð skilyrði. Varphænur í lífrænni framleiðslu njóta útivistar þegar veður leyfir en þó aldrei minna en þriðjung líftímans. Nesbúegg hafa gert ráðstafanir til að tryggja varphænum útivistartíma umfram þessi lágmörk með byggingu yfirbyggðs vetrargarðs þar sem varphænurnar halda til. Rými fuglanna á innisvæði er síðan 50% stærra en almennt viðgengst við hefðbundna eggjaframleiðslu og náttúrulegur undirburður er í húsinu. Allur annar aðbúnaður lýtur ströngum kröfum um velferð og vellíðan fuglanna. Þannig hafa þeir til dæmis frjálsan aðgang að rykbaði, hreiðri og setpriki innandyra.

Vottaðar lífrænar afurðir og náttúruafurðir hafa þá sérstöðu á markaði að allt ferli þeirra, frá ræktun eða söfnun hráefna, til pökkunar í neytendaumbúðir eða afhendingar í lausu, er undir eftirliti óháðs aðila, þ.e. vottunarstofu. Hún fylgist með því að uppruni og meðferð afurðanna sé í samræmi við alþjóðlegar og íslenskar kröfur um lífræna framleiðslu.

Fyrirtækið Nesbúegg var stofnað árið 1971, þá undir nafninu Nesbú hf., en það er nú eitt stærsta eggjabú landsins. Fyrirtækið sérhæfir sig í eldi á varphænum, allt frá ungaeldi til eggjaframleiðslu. Starfsemin fer annars vegar fram á Vatnsleysuströnd og hins vegar í Miklaholtshelli ll í Flóa. Þá rekur fyrirtækið einnig pökkunar- og vinnslustöðvar í Vogunum fyrir fersk, gerilsneydd og soðin egg og ýmsar aðrar eggjaafurðir.

Nánari upplýsingar má finna á heimasíðu Nesbúeggja

Nánari upplýsingar um vottun lífrænna afurða:
Vottunarstofan Tún ehf.