Ólafur G. Sæmundsson næringarfræðingur gefur góð ráð
„Staðreyndin er sú að eftir því sem farið er rosalegar í átakið, eftir því sem minna er borðað, þeim mun meiri líkur eru á að það hafi neikvæð áhrif á brennslu,“ segir Ólafur G. Sæmundsson næringarfræðingur í viðtali við Fólk, fylgirit Fréttablaðsins, í dag.
Þar er fjallað um rannsókn á þátttakendum áttundu seríu bandarísku Biggest Loser-þáttanna, en samkvæmt niðurstöðunum hægðist á efnaskiptum þátttakenda á meðan og eftir að keppni lauk. Þetta gerði það að verkum að þátttakendur áttu í erfiðleikum með að viðhalda þyngdartapinu.
Þannig þyngdist sigurvegarinn, Daniel Cahill, um rúm 108 kíló meðan á tökum stóð. Þegar hann skráði sig til leiks var hann 195 kíló, en að sjö mánuðum liðnum var hann 87 kíló. Sex árum síðar hafði hann bætt á sig 50 kílóum þrátt fyrir að reyna eftir fremsta megni að passa sig. Rannsóknin leiddi enn fremur í ljós að flestir af þeim sextán sem hófu leik höfðu þyngst umtalsvert og voru sumir orðnir þyngri en áður en þeir skráðu sig til leiks.
Ólafur segir í viðtalinu í Fréttablaðinu að þessar niðurstöður hafi ekki komið honum á óvart og segir að aðferðafræðin sem notuð er í Biggest Loser sé langt því frá viðurkennd af aðilum sem „telja má fróðasta“ í þessum efnum. Það sé fylgifiskur þess að léttast að líkaminn leiti aftur upp í hæstu þyngd.
„Fitufrumurnar leitast við að vera í eðlilegri stærð en þegar við ofbjóðum þeim og borðum fleiri hitaeiningar en líkaminn þarf á að halda þá fara fitufrumurnar að stækka umfram það sem telst eðlilegt. Við fitnum því og til þess að ná okkur aftur niður þurfum við að minnka fituna í fitufrumunum. Þó það gerist heldur teygjanleikinn í frumunum sér þannig að um leið og einstaklingur, sem var of feitur en hafði náð sér niður, fer að borða aftur of mikið þá fara aukahitaeiningarnar inn í fitufrumurnar og þær belgjast aftur út,“ segir hann.
Hann segir að fólk þurfi að passa vel upp á hitaeiningafjöldann þegar fólk er búið að léttast. Mikilvægt sé fyrir fólk sem vill viðhalda þyngdartapi að læra inn á eðlilegt mataræði og reglubundna og hóflega hreyfingu sem það getur fylgt eftir. Þá sé mikilvægt að borða holla og fjölbreytta fæðu og falla ekki fyrir kreddum og tískubólum.
