Vill leggja áherslur á mjúkar og kvenlegar línur
Konur verða að gæta sín á að slíta sér ekki út í tilgangslausri líkamsrækt sem miðar að því að byggja upp karlmannlega og samanrekna vöðva. Þetta segir leikkonan og sjónvarpskonan fyrrverandi Rósa Ingólfsdóttir í pistli á vefritinu kvon.is. Óhætt er að segja að Rósa fari mikinn í pistlinum.
Rósa segir líkamsrækt kvenna vera komna út í vitleysu. „Þegar ég lagði stund á dansmennt hjá Jazzballettskóla Báru hér um árið, þá æfðum við konurnar eftir kerfi sem kennt er við svokallað upphitunarkerfi atvinnudansara,“ segir Rósa.
Hún segir Báru aldrei hafa farið út í kraftlyftingar eða að svelta sig heldur lagt áherslu á mjúkar, kvenlegar línur og styrkan líkama. Í dag sé staðan hins vegar önnur – og verri.
„Konur eru farnar að nærast á grjónum og vatni og eru margar að umbreytast í einhverjar plastfælur, líta út eins og þrútnir karlmenn eftir átökin í ræktinni til að lyfta 120 kílóum í bakpressu. Þetta finnst mér ekki rétt. Konur eru konur og eiga að líta út eins og konur. Konan er ekki byggð eins og karlmaður. Konur vilja vera kvenlegar. Þess vegna er óskiljanlegt að konur í dag vilji lyfta lóðum sem nema á annað hundrað kílóum og bæta á sig umfram þyngd sem þær hafa svo ekkert að gera við,“ segir hún. Þess má þó geta að einkaþjálfarar og fleiri mæla með því að fólk lyfti lóðum, meðal annars í þeim tilgangi að brenna fitu.
Rósa segist ósjaldan hafa komið að konu grátandi úti í hörni því maðurinn hennar sagði að hún væri ekki nógu kvenleg. „Vilja konur virkilega vera svona þrútnar af átökum við lóðin og grenja svo bak við luktar dyr, því þær eru ekki nægilega kvenlegar? Ég hef ekki nokkra trú á því,“ segir hún og bætir við:
„Hverju sem fólk reynir svo að breyta með þessu þá er ekki hægt að vinna svona á móti náttúrunni; konur mega gæta sín á því að slíta sér ekki út í tilgangslausri líkamsrækt sem miðar að því einu að byggja upp karlmannlega og samanrekna vöðva. Styrkur konunnar er fólginn í mýktinni. Konan er sífellt að spegúlera í því hvort hún sé nógu falleg fyrir karlmanninn og finnst hún jafnvel of feit. Kvenleg fegurð er eftirsóknarverð en sannleikurinn er sá að allar konur geta verið fallegar ef þær bara slaka á og líta í gaupnir sér.“
Besta fegrunarmeðalið segir Rósa vera íslenska heimilismatinn. „Í heimalöguðum máltíðum sem eldaðar eru frá grunni, er öll bætiefni að finna og samhliða því sem konur ættu að æfa eftir kvenlegu æfingakerfi megum við ekki vaða svo langt í æfingunum að við förum að rymja í salnum og reka stórkarlalega við.“
Að lokum þakkar Rósa, Báru í Jazzballettskólanum, Dísu í World Class, Ágústu Johnson og Jónínu Ben. Hún segir þær hafa verið óþreytandi í viðleitni sinni til að hjálpa honum að rækta kvenlega fegurð sína.
