„Þetta er dýrgripur sem ég nota bara á sumrin,“ segir Guðmundur Birgir Pálsson, en hann er eigandi Ford Cortina árgerð 1965. Með hækkandi sól taka eigendur fornbíla á Íslandi að viðra gljáfægða fáka sína öðrum vegfarendum til yndisauka. Guðmundur eignaðist bílinn fyrir þremur árum en hann fræddi blaðamann stuttlega um sögu bílsins:

„Árið 1965 keyptu tveir bræður í Keflavík, þeir Guðmundur og Bjarni, kallaðir Leirubræður í Keflavík, þennan bíl, pöntuðu hann að utan. Þeir leituðu eftir mjög sérstökum bíl. Hann kom hingað svartur og allur rauður að innan, hann var stýrisskiptur og sex manna. Þeir hættu að keyra þennan bíl 1991 og lögðu honum í skúr suður í Keflavík. Þegar hann svo fannst árið 2013 var lakkið eiginlega farið af honum. Þá átti hann að fara í pressuna á haugunum en tveir menn náðu að hirða hann af sorphaugunum í Keflavík. Í kjölfarið var farið að vinna í því að koma honum á götuna aftur. Ég keypti bílinn sama ár, 2013, þá var búið að yfirfara hann þannig að hann var orðinn gangfær. Ég komst hins vegar fljótt að raun um að hann var mjög illa uppgerður. Ég fór í að gera hann upp aftur, skipti um mótor í honum, gírkassa, bremsur, nánast allt, skipti um rúður í honum. Í dag er ég að vinna í því að smíða upp annan mótor í hann.“

Að sögn Guðmundar er þetta síðasti fernra dyra Ford Cortina-bíllinn á landinu en enn séu til tveir tvennra dyra bílar af þessari tegund á landinu.