Hlýlegt andrúmsloft og kaffi í boði frá ýmsum menningarheimum
Elda Thorisson Faurelien, eigandi Café Haití, stofnaði kaffihúsið árið 2007 og hafa vinsældir þess aukist verulega með hverju árinu. „Ég byrjaði að brenna kaffi frá heimalandi mínu, nánara tiltekið Haití, í agnarlitlu húsnæði á Tryggvagötu 16,“ segir Elda. Í byrjun árs 2010 bauðst Eldu húsnæði fyrir Café Haití í verbúðunum við Gömlu höfnina eða blágrænu húsunum eins og þau eru gjarnan kölluð. „Í dag erum við á Geirsgötu 7b í miðbæ Reykjavíkur,“ segir Elda.
Eins og nafnið gefur til kynna koma kaffibaunirnar frá Haití en þær eru brenndar á staðnum til að viðhalda ferskleika. Fyrir utan mikinn og góðan kaffiilm er það hlýlegt andrúmsloft sem tekur á móti manni þegar gengið er inn á Café Haití. Elda nýtur þess að bera fram og vinna með kaffi, en auk þess að bjóða upp á espresso, capuccino, caffè latte og aðra kaffidrykki upprunna á Ítalíu er kaffiunnendum einnig boðið upp á tyrkneskt og arabískt kaffi að ógleymdri uppáhellingu. „Viðskiptavinirnir eru afar ánægðir með að fá alltaf nýbrennt kaffi, en auk kaffidrykkjanna er hægt að fá keyptar kaffibaunir sem eru malaðar ef þess er óskað,“ segir Elda.
Elda býður upp á ýmiss konar kökur og bakkelsi sem hún bakar sjálf, en einnig er nú á boðstólum ýmislegt annað matarkyns fyrir svanga gesti eins og til dæmis plokkfiskur með rúgbrauði, súpa dagsins, grænmetislasanja og ýmiss konar bökur. Matnum má skola niður með gosdrykk, bjór eða léttvíni.
Fyrir utan Café Haití er afgirt, skjólgott svæði þar sem hægt er að sitja og gæða sér á veitingum. Á góðviðrisdögum getur oft myndast skemmtileg stemning einkum þegar gestirnir leika þar á hljóðfæri. Um helgar er lifandi tónlist á staðnum, þar sem leikin eru lög frá ýmsum löndum, blús, djass, og eru flytjendurnir margir landsþekktir og andrúmsloftið afar notalegt.
„Við bjóðum upp á súpu og kaffi á aðeins 2.000 krónur alla daga og erum með morgunmat sem er í boði frá kl. 08.00 til 17.00 alla virka daga,“ segir Elda. Café Haití er opið mánudaga til fimmtudaga frá kl. 08.00 til 20.00. Föstudaga og laugardaga frá kl. 09.00 til 22.00 og sunnudaga frá kl. 09.00 til 18.00.
