Stórsýningin Verk og vit hófst á fimmtudag og stendur fram á sunnudag en hún er haldin í Laugardalshöllinni. Tilgangur Verk og vit er að kynna fyrir gestum vörur og þjónustu tengda byggingariðnaði, mannvirkjagerð og skipulagsmálum, en yfir 90 sýnendur taka þátt að þessu sinni. Ingibjörg Gréta Gísladóttir, framkvæmdastjóri sýningarinnar, er virkilega ánægð með hversu vel sýningin fer af stað og segir að hún hefði aldrei orðið að veruleika ef ekki væri fyrir nána samvinnu við sýnendur og aðra sem að sýningunni koma. „Hér liggur margra mánaða vinna að baki og allir hafa lagst á eitt við að gera Verk og vit sem glæsilegast. Þeir gestir sem eru búnir að koma hafa verið mjög jákvæðir og áhugasamir, svo við getum ekki verið annað en glöð með okkur og eiga ansi margir skilið hrós fyrir útsjónarsemi og vinnusemi hér í Höllinni,“ segir hún.

Fyrstu tvo dagana var Verk og vit opin fagaðilum. Um helgina eru svo allir velkomnir til að skoða sýninguna en af mörgu er að taka. „Hvort sem fólk er að hugsa um að taka eitthvað í gegn heimafyrir, í bústaðnum eða á vinnustaðnum getur verið áhugavert að líta inn hjá okkur og sjá hvað er í boði. Sýningin er aðallega stíluð inn á fagaðila en hér er líka fullt af vörum til sýnis sem henta inn á til dæmis heimilið. Má þar nefna gler, gólfefni og eftirlitsmyndavélar og eru sérfræðingar í hverjum bás sem eru boðnir og búnir að fræða gesti um vörur sínar,“ segir Ingibjörg.

Á föstudag komu yfir 1200 skólabörn á síðasta ári í grunnskóla á Verk og vit og var greinilegt að þeim sótti sýningin ekki síður áhugaverð en þeim fullorðnu. „Það er því kjörið fyrir foreldra að kíkja með börnin sín hingað í Laugardalshöll um helgina. Allir í fjölskyldunni ættu að geta fundið eitthvað við sitt hæfi,“ segir Ingibjörg.