Í mörg ár hafði ung kona að nafni Alyssa glímt við ofþyngd og offitu. Hún ákvað að taka sig á og leitaði til einkaþjálfarans Adonis Hill sem starfar í Brooklyn í New York.

Adonis þessi þekkir af eigin raun hvað það er að glíma við ofþyngd. Þegar hann var 27 ára fór hann að fitna í kjölfar atvinnumissis og í kjölfarið greindist hann með þunglyndi. Það tók hann nokkurn tíma að rífa sig upp úr sjálfsvorkunninni en þegar það tókst léttist hann um 35 kíló og helgaði líf sitt líkamsrækt og einkaþjálfun. Í dag er Adonis 35 ára.

Víkur þá sögunni að Alyssu sem leitaði til Adonis til að hjálpa sér. Adonis ákvað að fara óvenjulega leið til að hvetja viðskiptavin sinn áfram. Hann ákvað að bæta á sig 30 kílóum sem hann ætlaði að losa sig við hægt og rólega við hlið Alyssu í ræktinni.

Í viðtali við Buzzfeed segir Adonis að hann hafi fengið hugmyndina úr sjónvarpsþætti sem heitir Fit to Fat to Fit, þar sem einkaþjálfarar veita viðskiptavinum sínum innblástur með því að bæta á sig þyngd sem þeir síðan missa. Deila má um það hvort aðferðin sé góð fyrir líkamann en það er önnur saga.

Adonis og Alyssa hófu átakið í sameiningu og náðu þau bæði markmiðum sínum innan fárra mánaða. Alyssa léttist um 28 kíló og Adonis var kominn í sína réttu líkamsþyngd um svipað leyti.