Kokteilhátíð sem enginn vill missa af
Barþjónaklúbbur Íslands stendur fyrir hinni árlegu kokteilhátíð í samstarfi við helstu veitinga- og skemmtistaði í Reykjavík dagana 3. – 7. febrúar næstkomandi. Hátíðin hefst miðvikudaginn 3. febrúar og stendur til sunnudagsins 8. febrúar, þar sem henni lýkur með úrslitakeppni í Íslandsmóti barþjóna og keppni milli veitingastaða í kokteilgerð í Gamla bíó. Undankeppnir fara fram fimmtudaginn 4. febrúar og opnar Gamla bíó kl 19:00. Tómas Kristjánsson forseti Barþjónaklúbbsins segir viðburðinn verða vinsælli með hverju árinu enda mikið fjör og stemming alla helgina.
Barþjónaklúbbur Íslands var stofnaður árið 1963 en ári seinna hóf klúbburinn að etja saman barþjónum landsins í kokteilagerð. Vinningshafi hefur ávallt hlotið nafnbótina Íslandsmeistari barþjóna og keppt fyrir Íslands hönd á heimsmeistaramóti barþjóna sem að þessu sinni fer fram í Tokyo í september.
Fjölbreyttir kokteilseðlar verða víðsvegar um Reykjavík og munu staðirnir bjóða upp á kokteila á frábæru verði fram eftir kvöldi en um er að ræða kokteildrykki á aðeins 1.500 kr. til kl. 23:00 öll kvöldin dagana 3. – 7. febrúar. Auk þess munu allir helstu umboðsaðilar áfengra drykkja verða með kynningu á sínum vörum á meðan á keppni stendur í Gamla bíó og von er á góðri stemmningu í kringum viðburðina. „Því er um að gera að taka göngutúr um miðbæinn og skilja bílinn eftir því fjöldi góðra drykkja verða á boðstólnum,“ segir Tómas. Dómnefnd er skipuð af Barþjónaklúbbi Íslands sem mun ganga á milli og smakka valda drykki af kokteilseðlum þátttökustaðanna og velja sex bestu drykkina sem keppa svo til úrslita á sunnudagskvöldið í Gamla bíó. Vinningsdrykkurinn hlýtur nafngiftina Reykjavík Cocktail Weekend drykkurinn 2016.
Einnig mun Barþjónaklúbburinn bjóða upp á svokallað „Master Class“ á Center Hotel Plaza laugardaginn 6. febrúar milli kl. 14:00 og 19:00, en þar býðst gestum að smakka nokkrar tegundir af áfengi ásamt því að njóta fróðleiks frá þeim sem best til þekkja frá hverju umboði fyrir sig. „Fyrirlestrar verða í boði á þessum tíma og mun fjölbreytileikinn ráða ríkjum, þar sem að erlendir sem og innlendir gestafyrirlesarar koma og fræða okkur um vínheiminn,“ segir Tómas.
Á úrslitakvöldinu sunnudaginn 7. febrúar verður gala-kvöldverður í Gamla Bíó þar sem Anna Svava verður með uppistand og Dj Siggi Hlö mun halda fjörinu uppi með balli fram eftir nóttu. Það kostar 6.900 kr. á mann í matinn en 1.000 kr. sem koma eftir kl. 22:00.
„Það er von okkar að sem flestir láti sjá sig á Reykjavík Cocktail Weekend og njóti með okkur góðra veiga í bland við einstakan fróðleik, skál í boðinu!,“ bætir Tómas við. Aðgangseyrir er 1.000 kr. á forkeppnina á fimmtudeginum sem og á „Master Class“ á laugardeginum. Nánari dagskrá helgarinnar mun koma innan skamms á bar.is.
