Rowena Kincaid er dauðvona – Birti mynd af geirvörtu til að sýna hver einkenni brjóstakrabbameins eru
Rowena Kincaid, fertug bresk kona, er dauðvona af völdum krabbameins sem hún hefur glímt við í á þriðja ár. Hún greindist með brjóstakrabbamein árið 2013 og ákvað að birta mynd brjósti sínu á samskiptavefnum Facebook í þeirri von að vekja konur til umhugsunar um brjóstakrabbamein og einkenni þess.
Myndin var hins vegar fjarlægð af forsvarsmönnum Facebook jafn harðan og hún birtist augum almennings. Það er Rowena ósátt við og gagnrýnir hún vinnubrögð Facebook, eins vinsælasta vefs heims.
Þegar Rowena greindist með krabbameinið árið 2013 töldu læknar að hún ætti þrjá til sex mánuði eftir ólifaða. Með viljann að vopni blés Rowena á hrakspár lækna en undanfarnar vikur hefur heilsa hennar versnað og er talið að hún þurfi að játa sig sigraða áður en langt um líður.
Rowena gerði heimildarmynd um baráttu sína í samstarfi við breska ríkisútvarpið, BBC, sem bar heitið Before I Kick the Bucket, en hún heldur einnig úti Facebook-síðu með sama nafni. Þar deilir hún reynslu sinni með lesendum sem eru yfir tíu þúsund. Þann 23. janúar síðastliðinn birti Rowena mynd af hægra brjósti sínu, en á myndinni má sjá rauð útbrot við geirvörtuna. Einkenni brjóstakrabbameins geta verið margvísleg, en eitt einkenna eru einmitt útbrot og upphleypt húð við geirvörtuna, á sjálfu brjóstinu eða á bringunni.
Á innan við tveimur tímum eftir birtinguna höfðu 72 þúsund „lækað“ myndina og fór færslan víða um samfélagsmiðilinn. Síðar sama dag var búið að fjarlægja myndina þar sem hún braut gegn siðareglum Facebook. Rowena segir í samtali við breska blaðið Independent að fjölmargar konur hafi haft samband við hana og hrósað henni fyrir birtinguna, meðal annars af þeirri ástæðu að þær höfðu ekki hugmynd um að þetta væri eitt af einkennum brjóstakrabbameins. Hún kveðst vera ósátt við að myndin hafi verið fjarlægð, enda um mikilvægan boðskap að ræða. Það sé í raun „ógeðslegt“ að Facebook hafi fjarlægt mynd sem mögulega gæti bjargað mannslífum.
Rowena segist ætla að halda áfram að vekja athygli á einkennum brjóstakrabbameins á þeim tíma sem hún á eftir. Forsvarsmenn Facebook sögðust vera að skoða málið þegar Independent leitaði til þeirra.
