Fyrsti mánuður ársins er ekki liðinn svo líklega halda einhver áramótaheit ennþá. Umræða um skaðsemi sykurs og áfengis er ekki ný af nálinni, og eflaust hafa einhverjir ákveðið að taka sig á í neyslu þeirra efna.

Sacha Harland, hollenskur blaðamaður, er einn af þeim, en hann hætti neyslu sykurs og áfengis í heilan mánuð fyrir hollensku heilsuvefsíðuna LifeHunters. Að auki reyndi hann að borða sem náttúrulegastan mat og sneiddi hjá E-efnum. Á meðan bindindið stóð yfir tók hann regluleg myndbönd af sér til að geta miðlað líðan sinni og árangri.

Í upphafi mánaðarins fór Sacha í þolpróf og vandlega læknisskoðun, svo hægt væri að meta áhrif átaksins á líkama hans. Hann reyndist við góða heilsu, en hafði þó dálítið háar blóðfitur.

Sacha var stöðugt svangur og pirraður fyrstu vikuna. Hann lét auglýsingar um gosdrykki og skyndibita fara verulega í taugarnar á sér. „Ég bjóst ekki við að þetta yrði svona erfitt.“

Í myndbandinu er sýnt frá heimsókn Sacha til næringarfræðings, þar sem hann fræddist um áhrif sykurs á líkamann. „Þegar blóðsykurinn þinn hækkar, myndar líkaminn insúlín til að ná honum niður,“ útskýrir Marlou næringarfræðingur, „þá kallar líkaminn á meiri sykur. Sykur þreytir þig og áfengi gerir það líka með því að þurrka upp líkamann.“

Það var ekki fyrr en á 25. degi að Sacha fann ekki fyrir sykurlöngun þegar hann settist niður við morgunverðarborðið. Í síðustu vikunni var hann líka farinn að finna fyrir breytingum á líðan sinni, til dæmis var auðveldara að vakna og hann var hressari yfir daginn. „Ég bjóst ekki við svona miklum breytingum á mér líkamlega.“
Breytingarnar voru svo staðfestar í læknisskoðun í lok tímabilsins. Hann léttist um 4.5 kíló, efri mörk blóðþrýstings lækkuðu úr 135 í 125, kólesterólið lækkaði um 8% og blóðsykur var marktækt lægri.

„Í byrjun var þetta mjög erfitt,“ segir Sacha, „en þegar líkami minn hafði afeitrast af sykrinum gekk þetta mjög vel.“

Hér er myndbandið þar sem Sacha segir alla söguna:

[youtube https://www.youtube.com/watch?v=wyeor3z9EdQ&w=560&h=315]

Byggt á Buzzworthy.