Tuttugu og átta ára kona fékk þau tíðindi frá lækni að hún væri komin þrjá mánuði á leið þegar raunin var sú að hún var með leghálskrabbamein. Konan sem um ræðir heitir Jessica Dempsey og er búsett í Liverpool á Englandi.

Leghálskrabbamein

Hér á landi hefur skipuleg leit að leghálskrabbameini dregið úr nýgengi um 70% og dánartíðni um 90% frá því leit hófst árið 1964. Hægt er að leita til Leitarstöðvar Krabbameinsfélags Íslands. Ef þú hefur einhvern tímann stundað kynlíf, hvort sem það voru samfarir eða bara snerting við kynfæri annarrar manneskju gætir þú hafa smitast af HPV (Human Papilloma Virus). Leghálskrabbamein og frumubreytingar eru af völdum HPV sem er algengasti kynsjúkdómurinn í heiminum, líka á Íslandi. Flestar HPV-sýkingar eru einkennalausar, hættulausar og ganga til baka. Í sumum tilfellum getur veirusýkingin valdið alvarlegum frumubreytingum sem geta þróast í leghálskrabbamein, venjulega á löngum tíma (nokkrum árum eða áratugum). Alvarlegar frumubreytingar og leghálskrabbamein geta fundist við reglulega leghálskrabbameinsleit.Ef þú hefur aldrei stundað kynlíf þarftu ekki að fara í leghálskrabbameinsleit.

Í viðtali við Mail Online segir Jessica að hún hafi leitað allt að tíu sinnum til læknis vegna verkja í mjóbaki. Læknar sannfærðu hana um að verkirnir væru ekkert til að hafa áhyggjur; einn ávísaði sýklalyfjum þar sem hann taldi að um sýkingu í nýrum væri að ræða, annar taldi að Jessica væri komin þrjá mánuði á leið og sá þriðji taldi að um túrverki væri að ræða. Loks var hún greind með fjórða stigs leghálskrabbamein og hefur hún þurft að gangast undir erfiðar lyfjameðferðir vegna krabbameinsins sem hún er ekki laus við.

Jessica hvetur konur til að fara reglulega í krabbameinsleit. Hún sagði sögu sína á Facebook-síðu sinni og hefur pistli hennar verið deilt mörg þúsund sinnum síðan fyrir helgi. Hún byrjaði að finna fyrir verkjum síðla árs 2014, en sex mánuðir liðu þar til hún fékk rétta greiningu. Það gerðist eftir að niðurstöður blóðprufu lágu fyrir.

„Ég vissi að eitthvað væri að, eitthvað alvarlegra en læknarnir sögðu mér. Ég vildi að ég hefði staðið fastar á mínu,“ segir hún. „Þegar ég fékk greininguna fór heimurinn á hvolf. Þetta var svo mikið áfall en að sama skapi var ég ánægð að fá rétta greiningu. Ég vil ekki að aðrir gangi í gegnum það sama og ég. Ég vona að saga mín verði til þess að bjarga einhverjum.“

Sem fyrr segir er Jessica ekki laus við krabbameinið og er óvíst með batahorfur. Í samtali við Mail Online segist hún aldrei hafa búist við þeim viðbrögðum sem hún fékk vegna pistilsins. Fjölmargar konur hafi haft samband og sagst hafa látið tékka á sér eftir að hafa lesið pistilinn. Auk þess að hvetja fólk til að fara í krabbameinsleit hvetur hún fólk til að gefa blóð, því án blóðgjafa væri hún líklega dáin.