Vinnufélögum Jennifer A. Dalton, í Damascus í Maryland í Bandaríkjunum, var ekki rótt að morgni föstudagsins 25. september 2009. Jennifer, sem bjó í Mt. Airy, vann hlutastarf á dýralækningastofu í Damascus og hafði hvorki mætt til vinnu né tilkynnt forföll. Það var mjög ólíkt henni. Vinnufélagar hennar hringdu í hvort tveggja heimasíma Jennifer og farsíma, en án árangurs.
Að kvöldi þess sama dags kom í ljós að fyrir því var ærin ástæða; Jennifer Dalton var ekki lengur í tölu lifenda. Reyndar var enginn úr fjölskyldunni á lífi. Heimilisfaðirinn Charles Dalton eldri, eiginkona hans Jennifer, og tvö börn þeirra, Charles Dalton yngri, 14 ára, og Emmaline, 7 ára, höfðu öll verið skotin til bana.
Tíðindin komu nágrönnum og vinum í opna skjöldu, enda gat enginn ímyndað sér að nokkur vildi vinna Dalton-fjölskyldunni mein.
Að sögn nágranna var fjölskyldan vingjarnleg og trúuð og einn nágranninn hafði á orði að í hvert skipti sem snjóaði hefðu hjónin mætt með skóflur og mokað hjá honum heimreiðina.
Börn hjónanna voru vel liðin, hvort heldur var í skóla eða einkalífi. Charles Dalton yngri var sjálfboðaliði í ungmennadeild slökkviliðsins í Mt. Airy, sama fyrirtæki og kom að heimili fjölskyldunnar þetta föstudagskvöld eftir að hringt hafði verið í Neyðarlínuna.
Þegar inn í íbúðina var komið velktist enginn í vafa um að um morðvettvang var að ræða, en spurningin var: hvað hafði gerst. Frumrannsókn svaraði þeirri spurningu og ljóst var að enginn utanaðkomandi hafði verið að verki.
Lík Jennifer fannst í rúmi hjónaherbergisins. Charles yngri og Emmaline, systir hans, höfðu hlotið sömu örlög og lík þeirra fundust í svefnherbergjum þeirra.
Lík heimilisföðurins, Charles eldri, lá á gólfinu við hlið hjónarúmsins og upp við það lá haglabyssa; 12 gauge pumpa. Síðar kom í ljós að öll fjögur höfðu verið skotin til bana með þeirri haglabyssu.
Ekkert sjálfsmorðsbréf fannst á staðnum en talið hafið yfir allan vafa að Charles eldri hefði tekið í gikkinn í öllum tilfellum. Ekki einu sinni heimilishundurinn slapp, en hann hafði verið skotinn í bæli sínu rétt innan við aðaldyr heimilisins.
Hvað lá að baki þessu öllu saman hefur aldrei verið upplýst.
