Neysla á metamfetamíni hefur farið vaxandi á undanförnum árum og er ástæðan meðal annars sú að lyfið er ódýrara og öflugra en mörg önnur fíkniefni. En skaðsemi metamfetamíns – eins og annarra fíkniefna – getur verið mikil eins og meðfylgjandi myndir bera með sér.

Myndirnar voru fyrst birtar á vefnum Rehabs.com, en þar geta neytendur og aðstandendur leitað upplýsinga um meðferðarúrræði fyrir þá sem eru háðir eiturlyfjum. Breska blaðið Mirror fjallar um þetta á vef sínum í dag.

Að því er fram kemur á vefnum sýna myndirnar einstaklinga sem allir hafa orðið háðir metamfetamíni. Flestar myndirnar eru teknar með eins til tveggja ára millibili.

Sex ár á milli Hér má sjá mann sem varð háður metamfetamíni. Myndin til hægri er tekin eftir sex ára neyslu.

Lyfið er stundum kallað hættulegasta eiturlyf heims og það ekki að ástæðulausu. Lyfið getur valdið ofskynjunum og farið illa með húð fólks sem stundum heldur að pöddur séu undir húðinni. Þá dregur metamfetamín úr matarlyst sem gerir það að verkum að fíklar eiga það til að léttast óhóflega mikið. Loks má geta þess að tannheilsa metamfetamínfíkla er oft mjög slæm. Æðar þrengjast, glerungur tannanna eyðist vegna skaðlegra efna í eiturlyfinu og munnvatnsframleiðsla minnkar. Allt þetta hefur sín áhrif á tennurnar og heilsu fólks.

Lyfið er mjög ávanabindandi en það er til dæmis hægt að reykja eða sprauta í líkamann. Fráhvarfseinkenni geta verið alvarleg en mörg dæmi eru þó til um metamfetamínfíkla sem hafa snúið blaðinu við. Á vef Rehabs.com kemur fram að metamfetamínneysla sé einn helsti heilsufarsvandi sem Miðríki Bandaríkjanna glíma við um þessar mundir.

Í tölum sem birtar voru árið 2009 kom fram að 1,2 milljónir Bandaríkjamanna, tólf ára og eldri, höfðu neytt metamfetamíns á síðustu tólf mánuðum. Ætla má að sá fjöldi fari vaxandi miðað við vinsældir eiturlyfsins. Eru myndirnar birtar í forvarnarskyni, að því er fram kemur á vef Rehabs.

Skaðlegt Þetta er sama konan. Myndin til vinstri er tekin þegar hún er 21 árs en myndin til hægri sýnir sömu konu þegar hún er 29 ára.

Tvö ár á milli Á myndinni til vinstri er konan 29 ára en á myndinni til hægri sést sama kona tveimur árum síðar.

Ellefu ár á milli Ellefu ár eru á milli þessara mynda. Metamfetamín getur haft mjög slæm áhrif á heilsu fólks eins og myndin ber með sér.

Sláandi munur Hér sést metamfemínfíkill. Á myndinni til vinstri er maðurinn 45 ára en á þeirri til hægri er hann 54 ára.