Á morgun, laugardag, sest meiri hluti þjóðarinnar niður fyrir framan sjónvarpið, hámar í sig snakk og líklega margir sem fá sér aðeins í tána. Í ár hafa skapast miklar deilur um Eurovision og margir hverjir eru reiðir vegna þeirrar ákvörðunar að halda keppnina í Tel Aviv í Ísrael. Íslendingar eru þar ekki undanskildir og voru ansi háværar raddir um að við ættum að sleppa því að taka þátt í ár og mótmæla þannig þeim aðgerðum sem stjórnvöld Ísrael hafa tekið og aðför þeirra að Palestínu. Það verða því líklega einhverjir sem ekki ætla sér að fylgjast með keppninni í ár, þrátt fyrir að Íslandi sé spáð góðu gengi. DV fann því fimm hluti sem hægt er að gera í staðinn fyrir að horfa á Eurovision.
Ef þú hafðir hugsað þér að nýta tímann í líkamsrækt er líklega best fyrir þig að fara út að skokka. Ef þú ferð í ræktina verður líklega kveikt á Eurovision í öllum sjónvörpum þar og þú kemst ekki hjá því að sjá hvað fer fram. Eurovision er nokkuð langt sjónvarpsefni svo þú ættir að komast í ágætisform.
Ef það er sjónvarp á heimili þínu er líklegt að einhver heimilismaður muni vilja horfa á keppnina. Þá getur þú læst þig inni á klósetti og hlustað á hljóðbók. Með því útilokar þú bæði hljóð og myndefni. Passaðu þig bara að sitja ekki of lengi á klósettinu ef þér verður mál, þá færðu gyllinæð.
Ef þú býrð ein/nn og getur því ráðið sjónvarpsefninu þá er þetta tilvalinn tími til þess að rifja upp allar seríurnar af Game of Thrones. Hafir þú ekki séð þær nú þegar, er kominn tími til, enda lokaþátturinn sýndur í næstu viku og honum má enginn missa af.
Ef þú átt eftir að gera vikuinnkaupin þá er þetta tilvalinn tími til þess. Það verða líklega ansi fáir í búðinni og þú getur því gengið hægt og rólega í gegn og lesið innihaldslýsingarnar á öllum vörunum. Það er þó tvennt sem þú þarft að hafa í huga. Ekki gleyma heyrnartólum þar sem líklegt er að keppnin verði spiluð í beinni í útvarpinu í búðinni. Mundu svo að vera almennileg/ur við starfsfólkið því það neyðist til þess að afgreiða þig á meðan það reynir að fylgjast með keppninni í símanum sínum.
Sértu formaður húsfélags og almennt illa innrætt manneskja, þá er þetta einmitt tíminn til þess að boða alla íbúa á húsfund. Þar getið þið farið yfir sorphirðu, endurvinnslu og fyrirhugaðar framkvæmdir. Þá getið þið rætt bílastæðavandamál og rýnt ítarlega í ársreikninginn. Þú skalt þó ekki gera ráð fyrir því að verða kosinn í stjórn félagsins aftur á næsta ári.
