Á morgun ganga Íslendingar að kjörklefunum og þá er mikilvægt að vera góðborgari, landi og þjóð til sóma. Mikilvægt er einnig að hafa ánægju af því að vera virkur lýðræðisþegn. DV tók saman nokkrar grundvallarreglur um hvernig á að haga sér á kjördag.

Ekki taka barnið þitt með þér í kjörklefann eins og Logi gerði. Jafnvel þó það sé betur gefið en þú og hafi betri skilning á þörfum borgarinnar.

Ekki kúka í kjörklefanum og skeina þér með seðlinum. Jájá, þetta var mikið pönk á sínum tíma en líka viðbjóðslegt og við viljum öll gleyma þessu.

Ekki taka mynd af kjörseðlinum og birta hana á samfélagsmiðlum eins og borgarfulltrúinn Björk Vilhelmsdóttir gerði. Hún reyndi að eyða þessu en internetið gleymir aldrei.

Hugsaðu þig hundrað sinnum um áður en þú setur x við Karlalistann eða Íslensku þjóðfylkinguna. Viltu þetta í alvörunni?

Vandaðu valið á kosningapartíi. Það verður stuð og vel veitt til dæmis hjá Pírötum, Sjálfstæðisflokki, Samfylkingu og Miðflokki. Ekki viltu eyða kvöldinu í að spila Vist heima hjá Albaníu-Valda?