Rúmlega tveimur sólarhringum eftir sögulegt tilræði hins tvítuga Thomas Matthew Crooks við Donald Trump, fyrrverandi Bandaríkjaforseta, þá klóra rannsakendur sig enn í kollinum yfir því af hverju hinn ungi maður lét til skara skríða.
Þeir sem stjórna rannsókninni telja sig hafa orðið nokkuð skýra mynd af því hvað Crooks hafðist við í aðdraganda árásarinnar. Á föstudeginum heimsótti hann skotsvæði, þar sem hann var meðlimur, og æfði sig að skjóta af AR-riflinum sem hann síðar notaði í árásina. Skotvopnið var eitt af 20 slíkum í eigu föður Crooks, Matthew, og hafði verið keypt með löglegum hætti.
Daginn eftir heimsótti hann Home Depot og keypti sér stiga af heppilegri stærð og síðan heimsótti hann skotvopnabúð þar sem hann keypti sér 50 skot í umræddan rifil. Síðan keyrði hann í eina klukkustund að bænum Butler í Pennsylvaníu-fylki og slóst þar í hóp stuðningsmanna Trumps sem voru mættir til að fylgjast með kosningafundi hans.
Hann lagði bílnum á bílastæði en í skottinu hafði hann komið fyrir sprengju sem var tengd við fjarstýringu sem Crooks hafði á sér.
Hann er talið að hann hafi notað stigann til að, klifra upp á þak á nærliggjandi byggingu og hóf hann síðan skothríð á Trump nokkru síðar. Örskömmu síðar var hann svo sjálfur skotinn til bana.
Rannsakendur hafa síðan reynt að finna út úr því hvað var það sem ýtti Crooks yfir brúnina. Búið er að brjótast inn í síma og tölvu unga mannsins þar sem búist var við að vísbendingar yrði að finna. Svo reyndist þó ekki vera. Samkvæmt umfjöllun CNN hafa rannsakendur ekki fundið neitt annað en eðlilega netnotkun ungs manns sem hafði greinilega áhuga á forritun og tölvuleikjum. Ekkert bendir til þess að hann hafi aðhyllst öfgaskoðanir eða hafi haft einhverskonar þráhyggju eða áberandi hatur gagnvart Trump.
Sama niðurstaða fékkst af viðtölum við vini hans og aðstandendur. Árásin kom þeim í opna skjöldu enda virtist Crooks ekki hafa mikinn áhuga á pólitík. Hann var þó vissulega skráður meðlimur í Repúblikanaflokknum og hafði einnig látið örlítið fé af hendi rakna, 15 dollara, til Demókrata. Hann var hins vegar einfari sem átti enga vini og hafði átt erfitt uppdráttar í skóla þar sem hann varð fyrir einelti.
Það hefur vakið athygli rannsakenda að ekkert í netnotkun Crooks bendir til þess að hann hafi verið að afla sér upplýsinga um sprengjugerð. Eina vísbendingin er sú að þegar árásin var gerð var hann í bol merktum Youtube-rásinni Demolition Ranch, sem fjallar um byssur og sprengjur. Á þessari stundu er kenningin sú að sprengjan í bílnum hafi verið ætluð til þess að beina athygli lögreglumanna annað. Til þess kom þó aldrei því örfáum sekúndum eftir að hann hleypti skotunum af var Crooks allur.
Það má því segja að á þessari stundu hafi kviknað fleiri spurningar í hugum rannsakenda en svör við spurningunni, af hverju reyndi Thomas Matthew Crooks að ráða Donald Trump af dögum?
