Bandaríska orkufyrirtækið Xcel Energy hefur viðurkennt að mannvirki þess hafi átt þátt í miklum skógareldum sem brutust út í Texas í lok síðasta mánaðar en tveir einstaklingar hafa látist af völdum eldanna.

Fyrirtækið er staðsett í Minneapolis en selur rafmagn í átta ríkjum Bandaríkjanna.

Milljónir hektara lands brunnu og þúsundir dýra drápust vegna eldanna.

Fyrirtækið segir í yfirlýsingu að rannsókn þess hafi sýnt fram á að mannvirki þess hafi átt sinn þátt í að eldarnir kviknuðu.

Kona í Texas hefur lögsótt dótturfyrirtæki Xcel. Konan lagði fram lögsóknina á þeim grunni að einn af rafmagnsstaurum fyrirtækisins hafi brotnað. Það hafi orsakað að eldur kviknaði með þeim afleiðingum að á skömmum tíma hafi breiðst óviðráðanlegt bál.

Skógareldarnir kviknuðu norðarlega í Texas þann 26.febrúar síðastliðinn og urðu á skömmum tíma þeir umfangsmestu í sögu Texas og meðal þeirra umfangsmestu í bandarískri sögu. Eldarnir loga enn og ná sem stendur yfir um 500.00 hektara svæði en náðst hafa tök á um helmingi eldanna.

Eldarnir hafa brennt nánast jafn mikið landsvæði og brann í öllum skógareldum í Texas á árunum 2017-2021.

Þrátt fyrir viðurkenninguna hafnar Xcel því að hafa sýnt af sér vanrækslu við viðhald á mannvirkjum sínum. Fyrirtækið segir að fólk sem hafi orðið fyrir eignatjóni eða misst búfé í eldunum geti lagt fram kröfu.

Forstjóri fyrirtækisins segir það hafa starfað á svæðinu í 100 ár og lýsir yfir mikilli hryggð vegna þess mikla skaða sem samfélagið hefur orðið fyrir.

CBS greindi frá og ræddi meðal annars við þriggja barna föður, sem býr á svæðinu, en hann segir að ekkert sé eftir af heimili fjölskyldunnar nema aska.